Online Reporter
BAYATSHO abadala ukuthi impilo livili, lamuhla ophezulu kusasa uvuka sengaphansi ophansi sephezulu, yimpilo ke leyo singakhohlwa ukuthi noma yini singenzeka kungabi ndaba zalutho. Ngakho kuqakathekile ukuthi nxa singabantu siphathane kuhle ngoba ikusasa kayaziwa.
Okwenzakale kuwe lamuhla lomunye kusasa sokungenzakala kuye njalo umuntu odalwe nguNkulunkulu lamuhla kungabe kumomele kodwa elakusasa lakhe alaziwa. Sengavuka esekwelinye izinga elimangalisayo okokuthi abantu basala bebambe owangaphansi. Kumqoka ke ukuphatha wonke umuntu ngendlela efaneleyo. Inhlonipho kumele ibeyinto eqakathekileyo kukanti ubuntu kumele buhlale bupakathi kwethu njengabantu.
Sihlala sisizwa ngabomasitanda abatshayela amaloja abo eminye imithetho enzima okokuthi usuka uzibuze ukuthi umasitanda nxa ebona iloja uvele azibonele umntwana na, kambe nxa usuyanika umuntu omdala olemuli imithetho engaqedakaliyo uthi akhululeke njani ngoba lawe masitanda eminye imithetho yakhona ngeke wenelise ukuyilandela. Yebo kasali ukuthi umuzi ngomuzi ulomthetho wawo kodwa okunye hatshi kunzima.
Ufica indoda endala sokuthiwa kayidobhe amaphepha eyadini ingakayi emsebenzini. Uzwe kubekwa langesikhathi sokufika endlini.
Kwesinye isikhathi omasitanda uyezwa sebeze bebeka imithetho yokuthi kuphekwa njani emikulwini umangale ukuba kambe kwenzenjani umuntu esezibona esenguthixo.
Siyakwazi indlu ngeyakho sibili kodwa phatha omunye umuntu umhloniphe, umuntu omdala katshelwa ukuthi angene ngesikhathi esithile endlini. Nxa ungafuni akuphazamise ulele endlini yakho ebusuku mnike ezakhe izihluthulelo engakuhluphi nxa sengena endlini. Ukuthi umuntu ubuye wazoloja endlini yakho asikuthi udubekile, omunye ngohamba ngomsebenzi njalo uyabe elayo indlu lapho avele ehlala khona, ukuthi aloje kuwe yikuthi ngeke enelise ukuhamba esakha izindlu amadolobho wonke la ahambela khona ngomsebenzi kumbe ngesikolo.
Lani bantu abalojayo zamani ukuziphatha ezindlini zabantu, khululeka kodwa ungagcwali ibhavu phela ngoba usiziwe lawe ngokuthi ucatshise ikhanda. Ukhona omunye oxabane lomasitanda wakhe ngoba sechele imithandazo yakhe ayinikwe ngabaphurofethi bakhe umuntu sechela aze achele lekamelweni likamasitanda. Kambe kuyini khonokho? Endlini yomnikazi wena susenza imininingwane ungazange unikwe lemvumo? Asizameni ukuphilisana kuhle njengabantu, singahlali sibala kumaphephandaba kanye lemisakazweni ukuthi umasitanda sedlephane leloja kubangwa lokhu lalokhuya.
Asikho ezindlini kuphela abantu abaphatha abanye abantu njengezikorobho, lemisebenzini lapha yiziga zodwa. Umuntu angafika emsebenzini wakho mphathe kuhle mncedise ngalokho akudingayo ngoba akwaziwa lawe kusasa sungafika lapho azibambe khona udinga usizo lwakhe. Kungakho kuqakathekile ukuthi nxa singabantu siphathane kuhle ngoba ikusasa kayaziwa.
