Online Reporter
BAKWETHU okuhle kuyabukwa, umkhosi wokubukisa impahla kunye lemitshina etshiyatshiyeneyo okhona enkundleni yeZimbabwe International Trade Fair (ZITF) uyancomeka.
Ngitsho khona ukuthi nxa izethekeli zihamba zibuka impahla kunye lemisebenzi yamankampani atshiyatshiyeneyo, umuntu munye ngamunye uphuma ethwele akutholileyo.
Umkhosi lo oqale ngoMvulo wayonale iviki uzatshiya abantu ababukayo kunye lababukisayo bebala izinyanga ukuba uzaphinda ubekhona nini.
Kuyaphithizelwa enkundleni le, lonyaka yonke indawo igcwele amankampani ehlukeneyo avela emazweni ehlukeneyo.
Abadinga inhlanganiso yiloba yiphi, ulwazi oluthile, abafuna ukuqala amabhizimisi, abadinga ikolitshi yokuya batholakala khonale.
Phela uthola abantu betshiseka bezibuza ukuthi kungani ulutho oluthize lungatholakali ezitolo besitsho ukuthi inkampani ethize ayiwuqhubi kuhle umsebenzi wayo.
Inkampani zonezo abazikhuluma egudwini ziyabe zikhona, okudingakalayo kuphela yikuba bazilande bayebuza abangakuzwisisiyo. Kambe bazacatsha bathini.
Nxa njalo umuntu injongo yakhe kuyikubana angene ayezijabulela lemuli yakhe kambe kungabe kusalani nanku konke okokuzithokozisa lakho kukhona.
Abagcina umthetho labo babonakala beyaluzela besiya le lale kwazise bayawenza ngokugcweleyo.
Okuhle ngomkhosi lo obakhona kanye ngenyanga koNtuthuziyathunqa yikubana unika abantu bakuleli ithuba lokuthi babukise lokho abalakho.
Phela esikhathini esinengi umuntu ulakho ukuvula ibhizimusi lakhe acine eselivala ngoba lingahambi, abantu bengayithenga. Lokhu kuyabe kusenziwa yikuthi inengi labantu liyabe lingakwazi.
Uthola abantu beminyana emngceleni bechapha besiya kwamanye amazwe betshiya into efanayo abalakho ukuyithola ngentengo ephansi kwelabo ilizwe.
Kungakho-ke injongo yalo umkhosi yikubana abantu babukise ebantwini bakuleli kunye lakwabavela kwamanye amazwe lokhu abalakho.
Abanye abantu ababuya emkhosini lo baphuma bemanzi nte ngokuthaba ngoba sebethole ibhizimusi yabo abangamane bayisungule bencedisana.
Kuvele kunjalo empilweni, okuhle kubuya kanye ngemva kwesikhathi eside.
Kulokuthi umuntu amane ahlalele khatshana azwe ngabanye ukuthi umkhosi uqhubeka kanjani kuhle abekhona azibonele ngawakhe amehlo.
Inengi labantu eliza livela kwezinye izindawo lingazi lutho mayelana loNtuthuziyathunqa lilakho ukwehlelwa yingozi nxa liphuma kulo umkhosi nanku phela amasela asethiye indlebe akhangela umuntu oyabe engathi akalaqiniso lendawo ethize ukubana bazame ngazo zonke indlela ukumtshaya isikhwama.
Kungakho-ke kuqakathekile ukuthi umuntu yiloba ngubani avuse ikhanda angaze atshengisa ubani lobani ukuthi uyisethekeli.
Okunye njalo esithanda ukuthi izethekeli zethu zihlale zikwazi kuqala zinkamba zamapholisa ukwenzela ukuthi nxa besuke bawelwa luhlupho bazi indawo yokugijimela.
Inhle iBulawayo, abakholise abantu kuvele kumnandi ukuba lezethekeli, phela ziyaguqula indawo ibe angazathi akusiyo elikhulele kuyo.
Sifisela wonke umuntu ovakatshele kulo umkhosi ukukholisa okukhulu ukwenzela ukuthi ngomnyaka ozayo sibe sonke njalo.
