Online Reporter
Nkosilathi Sibanda
ABASAKHULAYO bakuleli sebekhuthazwe ukuthi basukumele phezulu, bazimele, bathathe umthwalo wokwakha ilizwe ezandleni zabo.
Inkuthazo le ivele kusaziwayo uGinger Lavida Moyo ngesikhathi ilizwe lithakazelela uZibuse ngeviki edluleyo, esikolo sePlumtree School, esabelweni seMatabeleland North.
Usaziwayo lo, udume ngokubabaza ubuhle bezindlu ezakhiwa emaphandleni emhlubulweni ongezansi yelizwe.
Uphinda abengusomabhizimusi, abengumncedisi wokuphakamisa ithalenta lokuhlabela lokuphakamisa imisebenzi yezakhamizi emaphandleni.
“Sithakazelela ukuthathwa kwelizwe, libuya ezandleni zabantu abamnyama. Sithi halala Zimbabwe. Kodwa-ke, njengabantu abasakhulayo ngithi kasithatheni intambo, sifunde ebantwini abadala, okuyibo abasinikeza lelilizwe.
Ngokwami ngikubona kulithuba lokuthi ngibhode kwelakithi, eMatabeleland, ngikhuthaza njalo ngibabaza ngemisebenzi yezandla enziwa ngabantu. Sigqugquzela ukuthi kube lengqubekela phambili, singasaleli emuva, njengokutshiwo nguMongameli uMnangagwa.
“Ilizwe lakhiwa ngabantu bakithi. Akekho ongasakhela ilizwe, ngaphandle kwethu. Asizibambeleni imisebenzi ekhona badala. Ilizwe ngelethu. Ngifuna ukuthi abantwabethu bafunde kakhulu kulokhu okwenziwe ngabadala bethu,” kutsho uMoyo.
Ugcizelele ukuthi ufuna ukusebenza labatsha kulumhlubulo welizwe, ebacebise kwezamabhizimusi lokubavulela amathuba okuqala imisebenzi elakho ukuphakamisa impilo zabo.
