admin
ABADALA babekuthanda kakhulu ukuthi beluleke abantu ngokuthi injobo enhle ithungelwa ebandla. Babetsho lokhu becebisa labo abalenhlupho ukuthi kuqakathekile ukuthi inhlupho zabo bazethule kwabanye abantu ukuze babancedise ukuzihluza.
Loba nje abanye babesithi hatshi ngeke bakwenze lokhu ukuhlinzela iqaqa ebandla, babekuphikisa lokhu abadala bathi yebo ye liyanuka iqaqa kodwa kanti kungathiwani nxa indaba kumele ilungiswe.
Babekubonile ukuthi ababili ngeke bakhulume bayilungise indaba bengacinanga ngokuxabana, njalo bengaxabana bangacina belimazana kukanti ngokuthungela injobo ebandla, abantu bayancedisana, bayitshukisane, kuthi loba iqinile amadoda ayidonselane ize ivume ithungeke.
Yiwo-ke umsebenzi webandla lo. Ukuncedisana ukubhula umlilo.
Babekubonile njalo abadala ukuthi nxa abantu belenkulumo abangazwisisani ngayo nxa bephakathi kwebandla kunzima ukuthi basuselane amanqe. Babesazi ukuthi bangaze bathukuthele njani kakho ongahle agalele omunye ngoba abanye bezalamula aze abhodle nxa kumele axolise aze akwenze lokho.
Kodwa nxa abantu bebabili bayenelisa ukuthi balimazane omunye acine efile ngenxa yenkulumo encane nje ebingalungiseka.
Lokhu sikutsho ngenxa yokwanda kwendaba esizikhupha kuphephandaba lethu maviki onke zabantu abaxabanayo bacine omunye esekogoqwanyawo kumbe omunye acine esebangwa lezibi esibhedlela kukanti labo abaxabanayo bebezakhuluma lindaba phambi kwabadala, abadala babakhuze kuphele nje kungela sidumbu phansi njengalokhu esivame ukukubala.
Okusemqoka njalo okuswelekayo empilweni zabantu yikukhuluma. Kuthiwa umlomo litshoba lokuziphungela nje ngoba uqakathekile. Yiwo obuzaxazulula lonke udaba.
Kungumbono waleliphephandaba ukuba abantu nxa sekuthe baba lokungazwisisani bazame ukudinga abantu abangabasiza ukuthi babahlalise phansi kudingidwe leyondaba ize ixazululwe ngokuthula kungabikhona ozasala ebophe umoya.
Ababona ngezomthetho labo sekukanengi bekhuthaza uzulu ukuthi angaze abeka umthetho ezandleni zakhe ngoba lokhu kucina kungamacala yikho nje labo baze bavula ihofisi ebona ngezobudlelwano lomphakathi ngemva kokunanzelela ukuqakatheka kokukhulumisana.
Online Reporter