admin
Listen Ndlovu
I-SPINACH yisilimo esiphangisayo ukukhula ngakho umlimi angazitshayela imali enengi engazinika ithuba lokulima isilimo lesi.
UNkosazana Nellie Banda ongumlimi, eBurnside uthe umlimi angatshaya imali enengi ngokulima i-spinach ngoba asiphuzi ukuvuthwa njalo umkambo waso uhleli ukhona kulabo abafuna ukuthengisa.
“Umlimi kumele alungise umhlabathi wakhe awufake umquba ikakhulu owenkukhu ngoba uthwala ukudla kwe-nitrogen okukhulisa kuhle isilimo se-spinach,” kutsho uNkszn Banda.
Uqhubeke wathi nxa umlimi elungiselela ukulima kumele agebhe amagodi atshona nge-5cm lapho azafaka khona inhlanyelo yakhe.
Uthe i-spinach sikhula kuhle emhlabathini ohlala umanzi.
“I-spinach sikhula kuhle emhlabathini ogcina amanzi kodwa emhlabathini ongagciniyo amanzi isivuno siyehla.
Umlimi ulakho ukuthola isivuno esihle nxa ehlalisa isivande sakhe silamanzi ngakho nxa engalima i-spinach kumele ahlale ethelela ukuze sikhule kuhle isilimo sakhe,” kuchaza uNkszn Banda.
“I-spinach siyakhula nxa kulelanga kodwa asifuni langa elinengi ngoba licina liphambanisa ukukhula kwesilimo.
Umlimi ulakho njalo ukusebenzisa uhlobo lwe-spinach oluthiwa yi-Malabar Spinach olukhulayo loba kulelanga.
“Singathelelwa noma kabili ngelanga ukuze umhlabathi uhlale umanzi kusiya ngomumo womkhathi,” kutsho uNkszn Banda.
“Umlimi uyakhuthazwa njalo ukuba isilimo sakhe asifake ifethalayiza ukuze sikhule kuhle njalo aqinisekise ukuthi i-pH yomhlabathi ingadlulisi 6.5 kumbe 7.0.
“Umlimi ulakho ukufaka utshani avale umhlabathi wakhe alime kuwo ukuze umhlabathi wakhe uhlale umanzi.
Kuqakathekile njalo ukuba umlimi aqaphele izibungu ezinjengama leaf-miners lomkhuhlane we-downy mildew ngoba kungehlisa isivuno sakhe,” kuphetha uNkszn Banda.
Online Reporter