Online Reporter
KUTSHWAQISA umzimba ukubona inani lezigebengu eselihlasela ngitsho lasemini libalele lisiya lisanda. Uthola ukuthi izigebengu lezi kazisesabi ngitsho, zihlasela zithumbe abantu ngezikhali eziyingozi zizenzele umathanda andubana zibaleke lezigidi zamadola.
EZimbabwe lokhu kwakuzwakalela emazweni akomakhelwane, kodwa lezinsuku ilizwe lethu selisesabeka ngoba izigebengu lezi sezihlezi zihlasela lapha lalaphaya ngitsho lasemini kabha.
Abantu koBulawayo sebehlezi bephethe izibindi ngezandla ngokwanda kwezehlakalo zobugebengu edolobheni. Ebusuku kabasabuquthi ngoba bengazi mhlawumbe bangazithela phakathi endlini.
Kulezehlakalo zokugqekezwa kwamabhanga, izindlu lezitolo. Kuzo zonke lezizehlakalo, kunanzelelwe ukuthi ubugebengu sebusenzakala libalele lasebukhweni bezinja.
NgeSonto izigebengu ezihlomileyo lezi zihlasele eCrystal Lounge koBulawayo lapho ezifike zathumba izisebenzi eziyisithupha andubana zidliwe ngumswenya le-US$4 300. Lokhu kwenza osomabhizimusi kunye lezisebenzi zihlalele evalweni ngoba kutshengisa ukuthi kakho ophephileyo.
Kuzindledlana abantu bethuselwa ngamabhemba, amahloka, ingqamu lakho konke okuyingozi abanye njalo bavele bahlaselwe ngezikhali lezi basale belwela impilo zabo, izigebengu sezibathathele impahla yonke eziyifunayo. Le akusinto enhle njalo akukholisisi ukuthi abantu bahambe belovalo lokuhlaselwa bathathelwa impahla yabo.
Kungumbono waleliphephandaba ukuthi amapholisa kumele azame ngakho konke okusemandleni awo ukubona ukuba uzulu wonke uphephile, kungaze kwabusa izigebengu.
Aluba abakhokheli bamapholisa bayananzelela indingeko yokuthi kuvikelwe umphakathi endaweni ezehlukeneyo bekele ukube begcwalisa amapholisa emigwaqweni.
Ukuthi amapholisa abonakale ebhoda-bhoda ehlola okwenzakalayo endaweni ezehlukeneyo kuzancedisa ukuthi ubugebengu osebubhahile behle.
Silethemba lokuthi umthetho wakuleli uzaguqulwa, izijeziso zezigebengu zengezelelwe zibe zinkulu ukuze lezizigangi nxa zinakana ukudala amacala zesabe ukuphinda ziwadale ngoba vele ukuganga akubhadali. Lababantu kumele bancitshwe ngitsho lebheyili.
Kuqakathekile njalo ukuthi uzulu ahlakaniphe avule amehlo nxa ehamba. Abantu bangaze basebenzisa indledlana ezisegangeni ezimnyama ebusuku ngoba kulapho lezi izigebengu ezibacathamela khona.
Kuyadingeka ukuthi amapholisa nxa abantu bangayabika amacala asukumele phezulu alandele umkhondo ukuze idolobho lingaqhubeki lisiba ngelenyamazana abantu belinyazwa mahlayana.
Abantu bayakudinga ukuzizwa bephephile ezindlini zabo. Sekuyisikhathi sokuthi iziphathimandla zilalele ukukhala kukazulu zithathe inyathelo lokumvikela.
Kuyadingeka njalo ukusebenzisana phakathi kwabomthetho kunye lezakhamizi ukuze kuqedwe ubugebengu lobu.
