admin
UKUBHEDUKA kwe-Corona kukhombise ukuthi amazwe kumele abambisane afake imali ezinhlelweni zezempilakahle.
Lokhu kutshiwo nguMqondisi wenhlanganiso yezempilakahle emhlabeni iWorld Health Organization (WHO), uDkt Tedros Adhanom Ghebreyesus, emhlanganweni wezinhloko zamazwe wokuhlafiuna udaba lweCoronavirus oqale ngoMvulo waphela ngoLwesibili.
Uthe babalelwa ku-310 000 ababulawe yileli gcikwane emhlabeni, abalegciwane uthe bangu-4.7 million emhlabeni.
“Umnotho emazweni amanengi utshayeke kakhulu ngenxa yokuhlasela kwegciwane, abantu abanengi baphelelwe yimisebenzi futhi kuyabonakala ukuthi lisaqhubeka lisabalala njengomlilo wequbula. Amazwe onke omhlaba athintekile lokhu kusikhombise ngokusobala ukuthi kumele amazwe abambisane kufakwe imali kwezempilakahle,” kutsho yena.
Uqhubekele phambili wathi ezempilakahle akuzona ezabathile kodwa yinto eyisidingo sakhe wonke umuntu, akumelanga zibhekwe njengezindleko kodwa kumele zibhekwe njengalapho okungafakwa khona imali.
“Njengamanje sidinga iWHO eqine ngaphezulu kwakuqala. Asidingi ukuthi kusungulwe elinye ikhomithi, ngaphakathi kweWHO ngoba konke lokho kwenziwa phambilini manje sidinga ukwesekwa ngemali lokuthi izinqumo esazithathayo zisetshenziswe,” kutsho yena.
Uthe uyazi ukuthi amazwe amanengi asezilungiselela ukuqala asebenze ukuze umnotho ungatshabali wathi uma engakwenza lokho ngokuphuthuma angalandeli imigomo ebekwe yile nhlanganiso angazithola ebuyele esigabeni sokuthi kumiswe ukusebenza kwezinto ezinengi ukuze kunqandwe ukusabalala kwegcikwane,” utsho njalo.
Online Reporter