admin
ISIKHATHI seZimbabwe International Trade Fair yisikhathi esiqakatheke kakhulu kwelakithi. Lesi yisikhathi lapho abantu bamabhizimusi atshiyeneyo abavela emazweni ehlukeneyo emhlabeni wonke jikelele abayabe bethe gwaqa koBulawayo kwelakithi bezobukisa amabhizimusi abo atshiyeneyo.
Umbukiso walonyaka weTrade Fair ubekhona ngesikhathi umhlaba ulwisana lobhubhane lweCovid-19 okwenze waba lomahluko kodwa uphumelele.
ITrade Fair ibikhona kuviki ephelileyo kusukela ngoLwesibili isiyagqitshwa ngoLwesihlanu. Indikimba yombukiso walonyaka ibilandela inguquko ebekhona kwezamambhizimusi ngenxa yeCovid-19 :
“Ukutshengisa ukuqhuba kwamabhizimusi ngendlela entsha.”
E-Trade Fair osomabhizimusi bathole ithuba lokutshintshana imbono engenza amabhizimusi abo akhule, njalo banikane imibono ngokuthi loba umhlaba wonke ubhekane leCovid-19 amabhizimusi angaqhutshwa njani kundlela le yokuphila entsha.
Abamabhizimusi benelise njalo ukuthi bahlahle indlela zokuthi bangasebenzisana njani, bachathekelana futhi ngabakwenzayo kumankampani abo, lokuba bangenza njani ukuze amabhizimusi abo adlondlobale loba isimo sinzima njengoba kuyisikhathi esinzima eseLockdown.
Njengoba abadala besithi indlela ibuzwa kwabaphambili silethemba lokuba abalamabhizimusi asacathula benelisile ukuthi bavakatshe kuzitendi zabamabhizimusi amakhulu bayathapha ulwazi olungasiza amabhizimusi abo ukuthi athuthuke kunye lomkhonomi wakithi.
Masingalibali ukuthi phela wonke umuntu ovakatshele eTrade Fair usuka efunde okunengi ngoba bakhona njalo abanye abathole ithuba lokuya eTrade Fair abangayisibo bosomabhizimusi kodwa labo benelisile ukuthi basuke bephethe okubili loba okuthatha okungabaphathisa ezimpilweni zabo.
Nanku umbuzo Mthwakazi omuhle kambe wena kumbukiso walonyaka obulomehluko kweminye imbukiso esike yaba khona eTrade Fair, usuke uphetheni wena kiyo.
Lesi yiso isikhathi sokuba ubani lobani ahlale phansi azibuze njalo aqedisise ngakudobhileyo.
Sesedlula isikhathi sokuba ungafunda ulutho ube suzitshela ukuthi uzathi usulusebenzisa ngoba isikhathi siyahamba, hlala phansi lamhlanje ucabangisise ngalokhu okutholileyo uzibuze ukuba kungaguqula njani eyakho impilo kusukela lamhlanje. Iqiniso yikuthi akukho okubuya lula konke kudinga ukuba ujuluke izithukuthuku kodwa ngelinye ilanga uzahlekelela lawe ususidla amandla okusebenza nzima kwakho.
Yiyo le indlela engenza ukuthi umkhonomi welizweni lethu uphumelele nxa singasebenza nzima.
Online Reporter