Online Reporter
Nkosilathi Sibanda
UMGUBHO wokunanza impilo lemisebenzi yeNkosi uMzilikazi umkhulu njalo ulenhloso enkulu lonyaka.
Inkosi yamaNdebele izakhunjulwa, ithakazelelwe, kwenziwe imicimbi ezajabulisa uzulu, kukhunjulwa emandulo, kubekwa imibiko yokukhulisa isizwe kwelakusasa, okwamalanga amabili ngoMpandula lonyaka.
Inhlanganiso yeMthwakazi kaMzilikazi Cultural Association ibike ukuba lonyaka iNkosi yamaNdebele izakhunjulwa ngendlela ehlukeneyo. Kubikwa umgubho uzaqhutshwa okwamalanga amabili. Akuzake kwenzakale lokhu kusukela ngomnyaka ka-2010.
IMthwakazi kaMzilikazi Cultural Association ibikele intatheli ukuthi isikhumbuzo salonyaka ngesokugqugquzela uzulu ukuthi athole imfundiso leqiniso lemvelaphi yesizwe samaNdebele lokuhlanganisa ilizwe labantu balo, kwaziwe, kube lokuzwisisana lokuvuma ukuqakatheka kwamasiko lokulondolozwa kwamagugu ezizalwane zeZimbabwe.
Inkokheli zeMthwakazi kaMzilikazi Cultural Association zethule umbiko mayelana lomkhosi weNkosi uMzilikazi, beselula ukuba lonyaka kuzaba ngumkhosi wamalanga amabili.
“Izinduna zomdabu, abakoKhumalo leMzilikazi Cultural Association zethula lumbiko ngokujabula, ukuthi umkhosi wokukhumbula lokuthakazelela iNkosi uMzilikazi uzaqhutshwa mhlaka 5 lo 6 Mpandula 2025.
“Umkhosi uzaqhutshelwa eKing Mzilikazi Memorial Site, koMhlahlandlela, indawo engamakhilomitha angu-22 usuka koBulawayo ngomgwaqo we-Old Gwanda Road,” kubika linhlanganiso.
IMthwakazi kaMzilikazi Cultural Association ibike ukuba indikimba yokukhumbula uMzilikazi ithi: “Siqoqa Isizwe Ngamasiko”.
Ngelanga lakuqala kubikwa kuzakuba lemfundiso lokuxoxisana ngembali yabantu abaNsundu, ikakhulu amaNdebele, lapho okuzahlangana khona ingcitshi zembali yamaNdebele, abafundi abasezikolo ze-primary lalabo abasemanyuvesi. Inhloso ingeyokukhankasa lokuqhuba ukufundisa ngamasiko lamagugu.
Ngalelo langa, ngokutsho kwabaqoqi bomkhosi umphakathi uzakhuthazwa ngokubaluleka kokulondoloza indimi, imigido, ingoma lemikhuba.
Ngelanga lesibili, mhlaka 6 Mpandula, kuzakuba lomcimbi ojwayelekileyo, ogoqela ukubuthana kwebutho leNkosi uMzilikazi.
Kukhangelelwe ukuthi kumalanga la, kube labantu abedlula i-5 000 njalo kuzabe kulabahlonitshwa abavela kuHulumende.
Kusenjalo, iMthwakazi KaMzilikazi Cultural Association ithe labo abafuna ukuphathisa ngezipho lokunye, bakhululekile ukuxhumana lenhlanganiso.
