Online Reporter
Ethel Ncube
IMBONGI yesiJahundeni isikhuthaze uzulu ukuba aqakathekise amasiko akubo njengoba linyanga kaNkwenkwezi kuyinyanga yokunanza ezamasiko.
ULerato Nqindi uveze ukuba amasiko yiwo insika yethu, yikho lapho okuvela khona ukuba singobani.
Ekhuluma lentatheli, uNqindi ubike ukuba uzulu kumele ananze amasiko akhe.
“Singabantu abaNsundu sigxile emasikweni ethu akumelanga siwalahle, kumele sihlale sikwazi ukuthi amasiko ethu siyawavuselela ngazo zonke izikhathi. Linyanga esikiyo yinyanga yamasiko, kungakho uzulu kaziphe ithuba athakazelele njalo akhumbule amasiko akhe abelomcimbi wokunanza amasiko.
“Abantwabethu kumele bazi ukuthi nxa sikhuluma ngamasiko sikhuluma ngani, lokhu kumele bakubonele kithi ngokuthakazelela amasiko ethu ngokwenza imicimbi etshiyeneyo,” kutsho uNqindi.
Uqhubekele phambili eveza ukuba uzulu wonke weZimbabwe ezindaweni ezitshiyeneyo kasekele ezamasiko.
“Siyafanana sonke elizweni lethu asihlanganeni ndawonye endaweni ezitshiyeneyo sibukise okuphathelane lamasiko ethu, sidle ukudla kwesintu, sivunule imvunulo yesintu, sigqoke siphelele, siqede sifundise intsha ukuba into okuthiwa lisiko kuyini. Amasiko yindlela esiphila ngayo, esigqoka ngayo, ukudla esikudlayo lakho kuyingxenye yamasiko, imigido, ingoma lokunye okutshiyeneyo kuyawaveza amasiko ethu.
“Mahlabezulu, uNkwenkwezi engapheli lawe ungazange uphatheke emcimbini okhuluma ngesintu sakini.
“Ngizabe ngibhoda lami ngihaya inkondlo ezikhuluma ngamasiko ukuze sivuselele amasiko ethu,” kuphetha uNqindi.
