Online ReporterLOKHU bekuyisinqumo sabanye babafundi bephephandaba le-H-Metro ngemva kokuba likhiphe ubuso benye indoda amapholisa acabangela ukuthi ngumgulukudu. Lindoda kubikwa iyingxenye yemigulukudu ebihlukumeza izakhamizi zeMabelreign, eMalborough leWestgate eHarare ngokutshontsha zisebenzisa udlame.
Omunye wababali baleliphephandaba uthe lindoda “Ngumgulukudu omuhle.”
Abanye akuzange kubajabulise ukuchaza lo ocatshangelwa ukuthi ulisela ngokukhangeleka kwakhe ngenxa yamacala abhekane lawo.
Amapholisa athi iqula lemigulukudu leli lahlasela latshontsha ezikolo ezine, kugoqela lomuzi ogcina intandane eWestgate, lapho abatshontsha imali engange US$ 31 000 batshiya bebulele unogada oyedwa.
Kubikwa ukuthi sekulamaviki iqula lemigulukudu leli liphazamise ukuthula kwabantu abahlala kundawo lezi kodwa kubukeka sengathi amapholisa angathola ithuba lokubopha amasela la.
Omunye wamasela la wathathwa yividiyo yeCCTV lapho abadala khona elinye icala, okwenze amapholisa abalethemba lokubamba abasolwa.
Amapholisa aveze umfanekiso womunye wamasela la njalo acele umphakathi ukuthi uwasize ukuze kuqhutshwe ukuchwayisiswa kwecala leli kungabotshwa abasolwa.
Lumfanekiso okhitshwe ngamapholisa kukhanya uhamba lenhliziyo ezinengi ezithanda ukubuka okuhle.
UYemurai Karen Bridge, omunye wabafundi be-H-Metro, ubhale ku-inthanethi wathi: “Hayi bo asibuhle besela leli.”
Isikhulumi samapholisa eHarare, uInspector Luckmore Chakanza, uthe amapholisa athole i-CCTV etshengisa ubuso bomunye walabo abadingwa ngamapholisa.
Lezi zithombe zatholakala endaweni lapho izigelekeqe lezi ezadala khona icala.
“IZimbabwe Republic Police, Harare Province, icubungula ngamacala okutshontsha eMalbereign lakwezinye indawo eHarare kusukela ngoNhlolanja.
“Simatasa ngokudinga labo abadala amacala la ukuze sibabophe,” ngu-Insp Chakanza.
Wengezelele wathi abasolwa okucatshangelwa ukuthi bangaba liqula lamadoda amane, bebehlasela amabandla ezokholo, izikolo kanye lemizi yabantu, besebenzisa udlakela ukungena ezindaweni, bagenqule abantu besebetshontsha imali lokunye okutshiyeneyo.
“Ezinye izinsolo eziphathelane labo eziphenywayo, zigoqela ukuhlukunyezwa kwabantu kwezocansi,” utsho njalo.
Amapholisa aseqinise ukuhambahamba ezindaweni ezitshiyeneyo ikakhulu ebusuku endaweni ezithintekayo.
U-Insp Chakanza uthe uphenyo luyaqhubeka njalo kukhona okutshengisa ukuthi imigulukudu le ingabanjwa maduze.
Uxwayise izakhamizi ukuthi zihlale ziqaphele ngaso sonke isikhathi, ziqinise ukuphepha kwemizi yazo, njalo zingagcini imali enengi emakhaya.
Nansi eminye yemiyalezo evela kubafundi bephephandaba leH-Metro:
Lona lihle isela lakhona bandla. — Mwana WaMai Jay.
Igazi lami ligijimile kancane ngibona umfanekiso wesela leli. — Rangarirayi Nzirayagaza.
Amajaha enu adingwa ngamapholisa yikho lingawaboni kulezinsuku — Justice Magagan
Uyabe uhlangane lomuntu lo uthi usuzitholele umkhwenyana kamama. Kunzima bakithi. Angisisosiphofu kodwa uthando luyisiphofu hahaha. — Yemurai Karen Bridge
Omaziyo kasize abantu. — Jean MaiChloe
Ngubaba kabani lo, ngumkabani, ngumntakabani. — Webster James Nyamutsita.
