Innocent Kurira
KUKHANGELELWE ukuthi kube lilanga elikhulu ngoMgqibelo kulabo abathanda ukugijima koBulawayo, kulandela ukuhlelwa komjaho wokuqala weKings Half Marathon, ozahlanganisa abagijimi abaphambili lalabo abafuna ukwelula imzimba yabo.
Umjaho lo, ozakwenzelwa eBusters Sports Club, uza ngesikhathi ezokugijima imango emide ziqhubeka ziletha amathuba okuthuthukisa amathalenta, ukukhuthaza impilakahle lokuhlanganisa uzulu.
Umgcinisihlalo weBulawayo Athletics Board (BAB), uWatson Madanyika, uthe bajabule kakhulu ngokulethwa komjaho lo edolobheni, njalo balethemba lokuthi uzakhuthaza abantu abanengi ukuthi bathande ezemidlalo.
“Silindele umjaho wokuqala weKings Half Marathon ngamehlo abomvu. Sithemba ukuthi kuzakuba lilanga lokuthaba, elizahlanganisa abantu.
“Siyathokoza ukubona umncintiswano onje uqhutshwa koBulawayo. Kuzakhuthaza abantu abanengi ukuthi baphatheke kwezokugijima, uphinde unike abagijimi ithuba lokutshengisa amathalenta abo,” kutsho uMadanyika.
Umjaho lo ukhangelelwe ukuba ngowokuncintisana okukhulu, kubanga le-21,1km, lapho okuzakuba labagijimi abalodumo emijahweni yokugijima emigwaqweni.
Abanye abagijimi abakhangelelwe ukuba khona bagoqela u-Isaac Mpofu owake wancintisa kuma-Olympics, uPhilipa Dube, Anne Chirisa, Moses Tarakinyu, Tendai Zimuto loMthokozisi Mhlanga.
Abagijimi laba balakho ukwenza umncintiswano ube mnandi njengoba bezabe belwisana ukuthola izicoco kumjaho wokuqala.
Abaqoqi bomjaho babeke imivuzo ezakhuthaza abagijimi ukuthi bancintise bakhangelele okungcono. Ozanqoba ibanga le-21,1km uzathola i-US$1 500, owesibili athole i-US$500 kuthi owesithathu athole i-US$250.
Kubanga le-10km, ozatshaya intambo kuqala uzathola i-US$500, owesibili athole i-US$250, kuthi owesithathu anikwe i-US$150.
Abazancintisa ku-5km labo bazathola imvuzo. Ozanqoba uthola i-US$250, owesibili i-US$150 kuthi owesithathu athole i-US$100.
Ukuhlelwa kwamabanga atshiyeneyo kuhlose ukunika abantu abanengi ithuba lokungena emjahweni, kungakhathalekile ukuthi bangabagijimi asebezijwayele kumbe ngabantu abasanda kuqalisa.
Umcimbi lo kawusoze ucine ngokugijima kuphela. Kubikwa kuzaqhutshwa umcimbi wokwelula lokuqinisa umzimba ohambisana lomculo, obizwa ngokuthi yi-zumba, imidlalo yabantwana lokunye okuzenza umcimbi lo ube ngowokuzithokozisa kwemuli yonke.
Umjaho lo uphinde ube yindlela yokukhuthaza impilakahle, ukuthuthukisa amathalenta abasakhulayo lokuhuga izethekeli ezithanda ezemidlalo lokusekelwa ngamabhizimusi.
Amabhizimusi asekela umjaho lo agoqela iBudget Cash & Carry Wholesale leBux Energy Drink, njalo kukhangelelwe ukuthi amanye amabhizimusi lawo azabe ekhona ekusekeleni umjaho.
Amabanga e-21,1km, 10km le-5km azaqala ngo-6 ekuseni eBusters Sports Club. Umango ovunyelweyo uzadlula kwezinye indawo eziseningizimu yakoBulawayo, ugudle iHillside Teachers’ College, eKusileni Hospital lezitolo zeLeeside. Kuzabe kulezindawo lapho abagijimi abangathola khona amanzi endleleni.
Njengoba umjaho ususondele, sekusele ukuthi kubonakale inani labagijimi abazangena lokuthi umncintiswano uzaphumelela yini ukuveza ithemba elikhona lokuthi uzakuba ngomunye wemijaho eqakathekileyo kwezokugijima koBulawayo.
