Nkosilathi Sibanda
UMONGAMELI welizwe u-Emmerson Mnangagwa usenike uzulu ithuba lokuhambisa imbhobho kunye lenhlamvu ezingabhaliswanga kumbe eyatholakala ngendlela engekho emthethweni emapholiseni.
Bonke abazahambisa imbhobho emapholiseni kusukela mhlaka mhlaka 12 Mfumfu kusiya ku 12 Lwezi 2026 kabasoze babotshwe kumbe babuzwe ukuthi bayithatha ngaphi kumbe ukuthi bayithola njani.
Kusitatimende samapholisa, isikhulumi samapholisa elizweni uCommissioner Paul Nyathi, uthe bonke abalemibhobho kunye lenhlamvu zakhona kodwa bengelawo amaphepha abanika imvumo yokuba babe lakho kumele bayihambise emapholiseni ngalesi isikhathi esibekiweyo.
“Abantu lenhlanganiso ezilembhobho engelamaphepha aqondileyo, kunye laleyo eyangeniswa elizweni ngokungekho emthethweni kumbe eyatholakala ngaphandle komthetho banikwa ithuba leli ukuthi bayihambise enkambeni zamapholisa eziseduzane labo,” kutsho uComm Nyathi.
Uthe uhlelo lolu luhambelana lesivumelwano samazwe eSouthern African Development Community (SADC) sokulawula imbhobho, inhlamvu lezinye impahla ezihambelana layo.
“Amapholisa aveze ukukhathazeka ngokuthi abanye abantu abalembhobho ebhaliswe ngokusemthethweni bayehluleka ukuvuselela amachence abo kumbe ukulungisa incwadi zabo.
“Ukuchwayisisa kwamapholisa kuveze ukuthi abanye abantu baqhubeka begcine imbhobho lanxa isimo abayithola ngaso sesitshintshile, njengokuvalwa kwamankampani, ukungasasebenzi kwamaqembu abathanda ukudubula kumbe ukufa kwabantu ababebhalise ukuba lemibhobho,” kutsho isikhulumi samapholisa.
“Sekunanzelelwe njalo ukuthi abanye abathengisa imbhobho abavunyelwa ngumthetho bagcina imbhobho engazange ithathwe ngabanikazi bayo ngemva kokuba benikwe ukuthi bayigcine. Lokhu akukho emthethweni ngoba kuphambene loMthetho olawula ukuphathwa kwemibhobho, iFirearms Act (Chapter 10:09).
“Amapholisa akhuthaze bonke abalembhobho esemthethweni ukuthi balungisise masinyane incwadi zabo enkambeni zamapholisa ukuze ibe semthethweni,” kutsho uComm Nyathi
Ngemva kokuphela kohlelo lolu, mhlaka 12 Lwezi, amapholisa athe azahlola njalo aqinisekise ukuthi abantu abasolwa ngokugcina imbhobho engekho emthethweni bayalandelwa.
“Abantu abafuna ukucaciselwa ngohlelo lolu bangaya enkambeni zamapholisa eziseduzane labo, kumbe bafonele inombolo yeNational Complaints Desk ethi (0242) 703631 kumbe bathumele umlayezo kuWhatsApp ku 0712 800 197.”
