YiNtatheli kaMthunywa
UMONGAMELI wenhlanganiso yeConfederation of African Football (Caf), uPatrice Motsepe, usebike ukuthi uzatshiya isikhundla ngo-2029.
UMotsepe, ongusomabhizimusi wodumo ovela eSouth Africa, wangena esikhundleni lesi ngo-2021.
Uthe ekuqaleni wayehlose ukusebenza ithemu eyodwa, kodwa waphinda wangena kukhetho ngo-2025 njalo akuzange kube lomuntu ayencintisana laye.
Uthe kasoze avume ukuncengwa ukuthi asebenze okwedlula amathemu amabili njengomongameli weCaf.
“Akulamuntu ozangincenga ukuthi ngisebenze okwedlula amathemu amabili kuCaf. Lokho akusoze kwenzakale,” kutsho uMotsepe.
Kusenjalo, uMotsepe, usechaze kabanzi ngezizatho ezenza inhlanganiso yeCaficabange ngokubuyela ehlelweni lwakuqala lokudlala umqhudelwano we-Africa Cup of Nations (Afcon) ngemva kweminyaka emibili.
NgoMpalakazi ka-2025, iCaf yabika ukuthi kusukela ngo-2028 umqhudelwano we-Afcon uzadlalwa ngemva kweminyaka emine kulokuthi udlalwe ngemva kweminyaka emibili njengo kujayelekileyo.
Isinqumo lesi samenyezelwa ngaphambi komqhudelwano we-Afcon ka-2025 eMorocco, njalo sasiyingxenye yohlelo lokuguqula indlela imidlalo eqhutshwa ngayo ukuze kuqiniswe imali yeCaf.
Kodwa uMotsepe useveze ukuthi isinqumo lesi sabakhona ngemva kokukhathazeka okwakukhona mayelana lomunye wabaxhasi abakhulu beCaf. Uthe inhlanganiso le yayingakhululekanga ngombono wokuthi amazwe alinde iminyaka emine phakathi kwemidlalo ye-Afcon.
UMotsepe uthe iCaf yaqala yacabanga ukuthi umqhudelwano we-African Nations League wawungaba yindlela yokulungisa inkinga yokulinda isikhathi eside phakathi kwama-Afcon.
“Sasibona ukuthi lesi isinqumo sasizakuba losizo olukhulu ngoba kwakulendaba eqakathekileyo esasiyihlolisisa ngomunye wabaxhasi bethu abakhulu,” kutsho uMotsepe.
Uqhubeke wathi iCaf yayingakaze ikhululeke ngokupheleleyo ngohlelo lokuthi i-Afcon idlalwe ngemva kweminyaka emine.
“Yikho nxa likhumbula, ekuqaleni sathi i-African Nations League izafana le-Afcon, ngoba sasibona ukuthi yiyo eyayingalungisa udaba lolu,” kutsho uMotsepe.
UMotsepe uchaze ukuthi icebo labo kwakuyikuthi i-Afcon iqhubeke idlalwa ngemva kweminyaka emibili, besekusungulwa umqhudelwano we-African Nations League owawuzadlalwa phakathi kweminye iminyaka.
Kwakuhlolisiswa njalo ukuthi i-Afcon ingaba lamaqembu amazwe angu-28.
