Nkosilathi Sibanda
UMCULI wakuleli owomdumo we-Afro Pop lamaPiano, uBrighton Golide, uqhubeka etshengisa ukuthi uyazi ukuhuga abantu emculweni wakhe nanko usethole ama-hits aphezulu kwe-100 000 kumsakazo webulenjini oweSpotify.
Okwenza lokhu kube yimbali enkulu kwezomculo yikuthi uGolide, ubengumculi wakuqala odabuka eGwanda, eMatabeleland South ukwenza lokhu. Umculi lo, osebenza ehlala kweleSouth Africa, waziwa kakhulu ngengoma ethi Wakhetha Mina.
Ekhuluma lephephandaba likazulu ngempelaviki edluleyo, uGolide uthe umculo wakhe uvela endleleni akhule ngayo njalo ufuna ukuwusebenzisa ukuguqula impilo zabantu.
“Ngaqala ukwenza umculo ngo-2021, ngikhuthazwa ngu-Oskido. Ukuzimisela kwakhe lothando alalo kwezomculo kwangikhuthaza,” kutsho uGolide.
Uthe ufuna umculo wakhe wehlise indubo abantu ababhekana lazo empilweni, ududuze abadabukileyo njalo uhlanganise abantu.
“Ngiyathokoza ngendlela ingoma ethi Wakhetha Mina esithole ngayo usekelo. Isidlule ku-100 000 streams kuSpotify njalo isisabalale kuTikTok, lapho esisetshenziswa ngama-influencer amanengi eSouth Africa,” kutsho uGolide.
Ngomnyaka ka-2025 wakhipha ingoma ezithi; UThando, Emanonini, Ngivulelen’ lo Nguwe Lo.
Lonyaka usekhiphe ezithi Wakhetha Mina, Mina Nawe, Olla G D A, Uyinkanyezi kanye lethi Ntombie.
