Online Reporter
Sikhumbuzo Moyo
UMPHATHINTAMBO wogatsha lwe-Information, Publicity and Broadcasting Services uDokotela Jenfan Muswere uzethekelela inhlelo zikazulu eziqhutshwa nguHulumende esabelweni seMatabeland North ngoLwesihlanu.
Uzaphinda njalo avakatshele umsakazo weLyeja FM edolobheni leHwange. Kuloluhambo, uDkt Muswere uzahlola umsebenzi wokulungiswa komgwaqo osuka koBulawayo usiya eFolosi. Phakathi kwalumango, uDkt Muswere uzadlula ebona idamu leGwayi-Shangani lesibhedlela seLupane Provincial.
Idamu leGwayi-Shangani laqala ukwakhiwa kudala kodwa kuthe kungena uHulumende okhokhelwa nguMongameli Mnangagwa, umsebenzi wokwakha wavuselelwa, kwaletha ithemba ebantwini beMatabeleland North. Nxa seliphelile, idamu leli kukhangelelwe ukuthi livuse imisebenzi eminengi egoqela ukulima, ukutholakala kwamandla kagetsi kunye lokutholisa amanzi koBulawayo.
Ngokutsho kwenkokheli lengcitshi kwezengqubekela phambili, udubo lwamanzi koBulawayo luzaqedwa yikuphela kwedamu leGwayi-Shangani.
UHulumende uzimisele ukuqeda wonke amaphurojekithi la lonyaka, okukhangelelwe ukuthi kulethe ingqubekela phambili elizweni lakithi. Inhlelo zikazulu lezi zibalulekele kakhulu njengoba uHulumende ehlose ukuthi kungabi lendawo kumbe umuntu osalela emuva ngumbono kaVision 2030.
Ukulungiswa komgwaqo osuka koBulawayo uqonde eFolosi (440km) besekubuyele emuva kunyanga ezedluleyo kubangelwa yikuna kwezulu. Umgwaqo lo ubaluleke kakhulu ngoba yiwo osetshenziswa yizethekeli nxa zisiya eFolosi lakwezinye indawo ezilemvelo ekhanga amehlo ezethekeli.
Kulandela ukuphela kwekhefu, wonke amankampani ayisitshiya galombili aqhatshwa nguHulumende asebizwe kakutsha ukuthi aqhubekele phambili ngomsebenzi.
Kusenjalo, ukuvakatshela eLyeja FM kukaDkt Muswere kuzakuba yisitshengiselo sokuthi uHulumende uzimisele ngokusekela ukusungulwa kwemisakazo esebenzisa indimi zakuleli. Ezabelweni zeMatabeleland, uHulumende usevule imisakazo kazulu eyisikhombisa.
