admin
YiNtatheli kaMthunywa
IJAHA lakoNkomo, uJoshua kaNyongolo, lazalwa ngomnyaka ka1917.
Kule iviki sikhumbula ilanga akhothama ngalo ngomnyaka ka1999 kuNtulikazi. Sikhumbula impilo yalindoda eyazinikela ekukhululeni ilizwe leZimbabwe. Kanti vele kuyini okwabangela ukuthi ijaha lakoNkomo lizinikele kangaka? Into yokuqala yikuthi abamhlophe babethumbe ilizwe likaMthwakazi.
Kwakuyisikhathi esinzima lesi esingelula ukusikhohlwa. Into eyacaphula abansundu kakhulukazi yikuthi abelungu bahle bathatha umhlabathi wonke omuhle babafuqela emalizeva lapho okwakungelamhlabathi omuhle. Ukuthathelwa umhlabathi kwabayinto yakuqala eyafuqa uNkomo ukuthi ananzelele ukuba kwakulobandlululo kuleli. Phela abeLungu babecabanga ukuthi umuntu omnyama ayikho into angayenza, akacabangi njalo akalancedo kodwa babengabuzanga elangeni.
UNkomo waba lombono okhaliphileyo ngezombangazwe wasesiba ngomunye walabo abaqala ukulwela amalungelo abo kweleZimbabwe.
Waba ngumuntu olelihlo elikhaliphileyo kwezokuphathwa kwabansundu ngabamhlophe. Wacina engena kwezama-trade union waphatheka kakhulukazi kuleyonhlanganiso.
Ngalezo nsuku ezombangazwe zazingakamemetheki kangako. Kwabunjwa iqembu elitsha lezombangazwe. Iqembu lelo lathiwa yiSouthern Rhodesia African National Congress, uNkomo wakhethwa ukuba akhokhele ibandla lelo kanti okaNyongolo usezithele emkhankasweni wokulwela amalungelo abaNsundu okuzamthatha iminyaka eminengi. Yikho lokhu ukuba ngumqali wesiziba lokuzinikela emzabalazweni wempi yenkululeko okwenza uNkomo athiwe nguFather Zimbabwe, uMdala Wethu.
Online Reporter