admin
YiNtatheli kaMthunywa
UHULUMENDE useyekethise kancane umthetho wengcuphe (curfew) ukuthi uqale ngehola lesificaminwe mibili ntambama njalo amabhizimusi lawo sezavalwa ngehola lika-4.30.
Uphinde njalo wathi abatshayeli bezimota zikazulu kumele bahlale behlolwa umkhuhlane weCovid-19.
Kunyanga edluleyo uMongameli uMnangagwa wabeka umthetho wengcuphe oqala kusihlwa ngehola lika 6 kusiya ekuseni ngehola lika-6 kukanti amabhizimusi wona abesesebenza kusukela ngehola lika 8 ekuseni kusiya kwelika 3 emini.
UHulumende uphinde njalo wathi kuzalandelwa indlela ezisetshenziswe ngesikhathi kulotshwa imihloliso kaNhlangula 2020 nxa sokulotshwa imihloliso yokuphela komnyaka kaLwezi loMpalakazi.
Ngenxa yokuthi ukumemetheka kwegcikwane leli kuqhubekela phambili kuleli, ikhabhinethi yenze isinqumo sokuthi kubekwe imithetho okumele ilandelwe ukuze kuphathwe labo abaleCovid-19 emakhaya. Phezulu kwalokho, ukuze kwenqatshelwe ukumemetheka kobhubhane lolu, kubikwa ilizwe kumele lizame ukuhlola abantu ngobunengi. Ngenhloso yokuqinisa ukulandelelwa kwalabo abatholakala beleCovid-19 kubikwa sekuzakuba lekhomithi yengcitshi ezivela kunhlangothi ezitshiyeneyo ezisebenzelana ndawonye ekulwiseni ubhubhane lolu.
Ikhomithi le izakuba lemigomo echazwe kuhle.
UMphathintambo obona ngezokukhutshwa kwembiko uMonica Mutsvangwa uthe labo abavela kwamanye amazwe nxa bengahlolwa batholakale bengelalo igcikwane leli kabaseyikuvalelwa kuma-quarantine centre kodwa bazabe bekhangelelwe ukuthi bayezivalela ezindlini babe sebelandelelwa ngabeRapid Response Team. NgoMvulo besekulabantu abangu-5 308 abaleCovid-19. Phakathi kwabo abangu-3 848 sebesilile kukanti asebebulewe ngumkhuhlane lo selikhwele laya ku-135.
Online Reporter