adminEmmanuel Ndlovu
KULANDELA insumansumane yodaba lwamangcwaba atholakala ephandiwe esigabeni seMakwa eHwange ngenyanga edluleyo sokuzwakale ukuthi kulesinye isakhamuzi sakulindawo okubikwa singasabuquthi ubuthongo ngenxa yokuhlukuluzwa ngomunye umuyi okwatholakala iliba lakhe ligejiwe.
Lesi isakhamuzi (ibizo silalo) esisebenza singunogada kweyinye inkampani ekulumango kubikwa saze sayadinga usizo kwabomoya ukuze kulahliswe umoya kamuyi.
“Inkinga ezifana lalezi ziyafihlwa lapha esigabeni njalo abadala besigaba ikakhulu laba esibathembileyo yibo ababandezela indaba le ngoba labo baphakathi.
“Ngemva kokuphandwa kwamangcwaba esinye isakhamuzi saqala ukuziphatha ngendlela engazwisisekiyo okomuntu ongathi kasaphilanga kuhle engqondweni.
“Wayekhala ngokuthi umuyi uyamlanda iloba ngasiphi isikhathi selanga emhlupha esithi kungani wambulala njengoba emzini wakhe umangoye uselala eziko.
“Wagijima wayadinga usizo kumphurofethi uNyajani lomunye umama oyinyanga kodwa bonke laba bala ukumnceda,” kutsho esinye isakhamuzi esihlala kulindawo.
Ingcwaba likamuyi uGilbert Mapeta latholakala ligejiwe ngenyanga edluleyo kanye lelesinye isakhamuzi esivezwe ngokuthi nguKillion Ncube. UMapeta kubikwa wabhubha ngemva kokuqaleka esemsebenzini we-Food for Work.
“Abantu bakholelwa ukuthi ukuze umuntu abelamandla njalo esatshwe ngabanye esigabeni, kumele abulale omunye umuntu osebenzayo. Kukhanya yikho okwenzakala kumuyi,” kugcizelela lesi isakhamuzi.
Usobhuku wakulindawo uMnumzana Shadreck Ncube uthe isiga sesakhamuzi lesi kasizwanga.
“Kundaba yamangcwaba atholakala ephandiwe akulasandla somuntu kuyo njalo lokhu okukhulunywa ngabantu kungenzeka kube ngamanga nje aluhlaza
“Mina ngicabangela ukuthi mhlawumbe amangcwaba la aphandwa ngomayelane,” kutsho uMnu Ncube.
Online Reporter