admin
Bongani Ndlovu
ZISELE zikhakhamele izakhamizi zeGomoza eLupane ebezisemfeni nanko phela ngelanga lokubekwa isisu sesidumbu sikamufi sikhukhumale saba yinkalakatha okokuthi besesingaseneli phakathi kwebhokisi.
Kubikwa ibhokisi lehluleke ukuvaleka okokuthi umuyi ungcwatshwe ibhokisi likhamisile ngenxa yokukhukhumala kwesisu.
UMnumzana Bhekilizwe Wabayi ubekwe ngeSonto eledluleyo ngemva kokuba esweleke ngemva kokungaphatheki emzimbeni okwezinsuku ezimbalwa.
Intatheli kaMthunywa izwe ukuba ngaphambi kokuba aswelakale uMnu Wabayi ubecatshangelwa ukuba udle itshefu ngoba ubelamalanga egula. Kodwa ngemva kokuba isidumbu sakhe sikhukhumale isisu bakhona akade sebecabangela ukuthi mhlawumbe yilunyoka. Kubikwa yena watshela abantu ukuthi angabe wadla itshefu emzini wesinye isihlobo sakhe ethi yikho okubangela ukugula kwakhe.
Intatheli kaMthunywa ibuye yaxoxisana losobhuku wesigaba uMnumzana Joel Tshuma othe umuyi wabekwa isisu sakhe sesikhukhumele okonanane.
“Ngesikhathi umuyi ebhubha besengilesikhathi ngingambonanga njalo angazi okunengi ngokuba ukugula kwakhe kwavelelaphi.
“Isidumbu sakhe besikhukhumele isisu ngendlela eyesabekayo okokuthi abantu bethukile bebona esezabekwa ibhokisi likhamisile nanko phela bekusehlula ukuthi livaleke.
“Sithe sibona lokhu lathi njengabantu abadala sihle sesula imicabango yokuba ngabe efakelwe itshefu ngoba lokhu kuyinto ehambisana lolunyoka okuyinyamazana esetshenziswa ngobaba ukuthiya imizi ukuthi nxa kulomuntu oweqe uthango abanjwe yizo incingo ezifana lalezi,” kuchaza uMnu Tshuma.
USobhuku uTshuma uqhubeke waveza ukuba ulunyoka luyinto evamileyo kubobaba abaxhwalileyo abahamba bethiya omama.
“Okusenza sicabangele ukuba yilunyoka yikuthi ukukhukhumala kwesisu somuyi kulokuhlangana lemisebenzi yolunyoka njalo ulunyoka luyinto evamileyo kungakho sesimbambathe indaba yetshefu ngoba abantu belakho ukusebenzisa ulunyoka lapho bethiya uthango lwemizi yabo ukuze babambe kumbe bengabikhona abeqa uthango lwemizi yabo,” kuchaza uMnu Tshuma.
Intatheli kaMthunywa ibuye yakhulumisana loMnumzana Shooter Ngwenya ongomunye wabosiyazi bakoBulawayo othe ukukhukhumala kwesisu sesidumbu kulengcazelo ezimbili. “Ukukhukhumala kwesisu sikamuyi kumele kucubungulwe kwaziwe ukuthi kuqale nini. Nxa kuqale esaphila kuyabe kuyilunyoka ngoba lona luhlasela abaphilayo kodwa nxa kuyitshefu yona ibangela ukuba isisu sikhukhumale ngemva kwamalanga umuntu eseswelakele,” kuveza uMnu Ngwenya.
Online Reporter