admin
UMDLALI othenjiweyo kuqembu lama-Warriors uMarvelous Nakamba ulakho ukukhutha ukuyadlala kumqhudelwano we-Africa Cup of Nations, nanko phela kubikwa uselimele idolo.
Ukulimala kwalumdlali kuvezwe liqembu le-Aston Villa kuliviki, kumbiko oveze ukuba ulimele ngesikhathi somdlalo wabo leLiverpool; ngoMgqibelo odluleyo.
Umqeqetshi we-Aston Villa uSteven Gerrard ubikele intatheli kulelo ukuba ngempela uNakamba uzakuthi ukuhlala phansi akhangelisiswe ngodokotela.
U-Nakamba usejabulise uGerrard ngesikhathi esifitshane lumqeqetshi efike eqenjini.
Abalandeli benguqu kuleli laseNgilandi basebeqale ukuzibuza ukuthi ngabe lumdlali ufanele na ukudlala kulesi isibanga.
Umqeqetshi wama-Warriors uNorman Mapeza wazise iphephandaba likazulu phakathi kwaliviki ukuba uzalinda impumela yabodokotela ukuze akwazi ingqubekela phambili ngoNakamba.
Umqeqetshi lo okwamanje usenkingeni yokuthi akhethe kuhle iqembu eliqinileyo nanko phela labadlali ababalisa uMarshall Munetsi loBrendon Galloway balimele.
Umqhudelwano we-Afcon ungoZibandlela ezweni le-Cameroon.
Kusenjalo, uGerrard ubike ngokukhathazeka okukhulu ngokulimala kukaNakamba.
“Zindaba ezimbi lezi ngoba uMarvelous ubesedlala ngezinga eliphezulu.”
Ama-Warriors akhangelelwe ukuthi angene enkambeni yokulolonga ngeviki elizayo, okutsho ukuba abadlali abasoke bakholise ikhefu leKhisimusi ngokugcweleyo.
IZimbabwe ihlelwe ukuthi incintise kuqula lika-B lamazwe abalisa iSenegal, Malawi, le-Guinea. Kumdlalo wakuqala ku-Afcon, abafana bakaMapeza bazadlala leSenegal mhlaka 10Zibandlela.
Kunengi okulindwe ngabalandeli beqembu lesizwe kulumqhudelwano kodwa okukhathaza inengi yindlela amalungiselelo aqhutshwe ngayo.
Ukulwa phakathi kwenhlanganiso yeSports and Recreation Commission leZimbabwe Football Association sekubangele ukuthi uMapeza ehluleke ukuqala amalungiselelo.
Nxa kuqathaniswa lamanye amaqembu akuqula lika-B, ama-Warriors yiwo asalele emuva.
Kwandise ukuthi kumincintiswano enje amaqembu angenge enkambeni okwamaviki aphezulu kwamathathu.
Online Reporter