admin
Thokozile Mbedzi
ZILOKHU zitshwaqe umzimba izakhamizi zesigabeni seMthotobi eKezi ngemva kokuba enye indoda ifike komunye umuzi idinga indawo yokulala andubana ivuke ibulele isisebenzi sakulowo muzi.
Umetheswacala uMxolisi Dube okungasatholakalanga iminyaka yakhe kubikwa ubulele uMnumzana Ernest Khumalo oleminyaka engu-52 mhlaka 20 Nkwenkwezi.
Kuzwakale ukuthi uDube obesebenza esigabeni seCombe Manyano wafika lapho okusebenza khona uKhumalo wacela indawo yokulala andubana avuke ebulele uKhumalo ngebhanti.
Ekhuluma lentatheli kaMthunywa uMnumzana Mpilo Mpofu uthe lokhe bengelankani ngesenzo sikaDube ofike eyisethekeli.
“Kukhanya uDube wathi esamukele mhlaka 19 Nkwenkwezi basuka baya ezitolo zeMountadge Centre loKhumalo bayazilibazisa benatha utshwala belabanye.
“Umntwana obelala loKhumalo ngalelolanga walala kogogo ngoba bephuze ukuphenduka. Ekuseni esesiya esikolo wafica kuvaliwe wadlula waya esikolo.
“Esevela esikolo wabuya watshela abantu ukuba uKhumalo kamboni. lzakhamizi zahle zasukumela phezulu zaqala ukudinga ngesikhathi bezama ukukhangela endlini ngewindi babona umuntu elele kukhanya ukuthi angabe esefile bahle bayabikela amapholisa,” kulandisa uMnu Mpofu.
Isikhulumi samapholisa esabelweni seMatabeleland South uAssistant lnspector Mkhwananzi ebuzwa ngodaba lolu uthe solufikile ehofisini yabo ngakho uzulu kananzelele ngaso sonke isikhathi njalo bengabo yamukela abantu abangabaziwayo.
“Uzulu ngaso sonke isikhathi kumele engamukeli abantu angaziwayo, kababikele abaphathi bezigaba loba amapholisa,” kuphetha uInsp Mkhwananzi.
Online Reporter