Dorothy Sithole
Sukulwenkosi Dube-Matutu
KULONOGADA oleminyaka engu-59 yokuzalwa ogwetshelwe ukuyapika iminyaka engu-15 ejele kulandela ukutholakala elecala lokudlwengula umntakamakhelwane oleminyaka emithathu.
Umsolwa esingeke samqamba ngenhloso yokuvikela umntwana, wenze icala leli mhlaka 11 Mpalakazi ngomnyaka odluleyo.
UMantshi uNkosikazi Sithembiso Ndebele esethula isigwebo uthe isenzo sikametheswacala siyesabeka ngoba engumuntu omdala obekumele avikele umntwana.
“Umsolwa ngumakhelwane kamamangala njalo engaba ngukhulu kamamangala. Ubekhangelelwe ukuthi amvikele, kodwa yena wahlukuluza umntwana ongenelisi lokuzivikela,” kutsho uNkkz Ndebele.
Uthe umsolwa wenza lokhu ngesikhathi umamangala evakatshele lapho ahlala khona labanye abantwana.
Inkundla izwe ukuthi mhlaka 11 Mpalakazi ngehola lika 10 ekuseni, umsolwa wabiza abantwana ababedlala enkomponi yemgodini weWest Nicholson ukuthi babuye lapho ahlala khona, lapho afika wahlukuluza khona umamangala.
Umntwana lo wabonakala unina esehlabe umkhosi ukuthi kamboni. Esinye isihlobo esasincedisa ukumdinga, sabuza abantwana ababedlala laye, abambikela ukuthi ungene emkhukhwini kanogada lo.
Umtshutshisi, uMnumzana Ngonidzashe Shumba ubikele inkundla ukuthi isihlobo lesi safika sangena phakathi emkhukhwini sathola umsolwa kunye lomntwana belele embhedeni.
Wananzelela ukuthi ibhanti likamsolwa lalikhululiwe kukanti ibhulugwe elaligqokwe ngumntwana lalisemadolweni.
Ebuzwa ngalokhu umsolwa wehluleka ukuchasisa, wazivala ngengubo.
Indaba le yabikelwa amapholisa, okwenza umsolwa wabotshwa wasiwa emthethwandaba.
Online Reporter