Online Reporter
Ethel Ncube
ZILOKHU zithwele imikhono ekhanda izisebenzi zakomunye umgodi oseNtunjambili, eMatopo ngemva kokuba unogada wenkampanini le, efike emsebenzini edakiwe watshontsha umbhobho andubana adubule elinye inina wabuye wadlwengula elinye.
Umetheswacala uLloyd Mutsengi oleminyaka engu-50 yokuzalwa obesebenza komunye umgodi wenze imbedumehlwana le, ngeSonto kuyonale iviki.
Kuzwakale ukuthi uMutsengi wafika emsebenzini edakiwe waliswa ukuthi asebenze kodwa kulokuthi abuyele ngekhaya watshontshela omunye asebenza laye umbhobho womhlobo we-shotgun rifle awusebenzisa ukudubula inina.
Isakhamuzi esikhulume lentatheli sibike ukuthi amanina la ayehamba emabili aze ahlaselwe nguMutsengi.
“Ubaba lo ubelinda lapho okugejwa khona igolide kodwa asazi ukuthi kwangenani kuye. Ubeke afike ezitolo lapha ezonatha. NgeSonto wahamba emsebenzini edakiwe bakunanzelela bathi kabuyele ngekhaya kodwa yena wasuka wayatshontsha umbhobho wabaleka.
Ekubalekeni kwakhe wahlangana lamanina amabili wathi kabahlubule impahla omunye wala. Lo owalayo wahle wamdubula wafa.
“Unogada lo wahlangana lamanina amabili esigabeni khonapha wawalaya ukuthi ahlubule impahla kodwa omunye wala okwenza wahle wamdubula wafa kukanti lo omunye wamdlwengula.
“Undoda lo kakabanjwa, asazi ukuthi ucatshe ngaphi kodwa esikwaziyo yikuthi uyingozi kumphakathi wakithi,” kubika isakhamuzi lesi.
Amapholisa aqinisekisile ngesehlakalo lesi.
Kusitatimende samapholisa kunkundla ye-X amapholisa abike ukuthi adinga umetheswacala uLloyd Mutsengi (50).
“Sidinga uLloyd Mutsengi owabulala inina wabuye wadlwengula elinye ngeSonto. Umetheswacala wethusela amanina la ayehamba emabili ukuba uzawadlwengula engakadubuli omunye owayalayo.
“Umetheswacala waqhubeka wadlwengula omunye lo waqeda wabaleka. Ongabe esazi lapho okulometheswacala khona kazise amapholisa aseduzane laye.”
