Online Reporter
YiNthatheli kaMthunywa
KULENINA elileminyaka engu-38 yokuzalwa leHighfield eHarare, uChipo Kahuni elaphuma kuvidiyo kunkundla zokuxhumana lisithi laphendula umbala wejwabu lalo laba yi-yellow bone ngoba abesilisa bethanda abesifazana abamhlophe.
Inina leli kuvidiyo yalo lithi liyazisola ngoku-bleacher elakwenzayo ngoba selibhekana lenhlupho ezehlukeneyo ngokugcoba okwaphendula ijwabu lalo.
Abesifazana abanengi kuleli bagcoba amafutha abanye njalo banatha amaphilisi atshiyeneyo ngenhloso yokuthi babe ngama-yellow bone.
Kuvidiyo le, abanengi baphosa imbono yabo okuveza ukuthi indaba yoku-bleacher ithinta abantu abanengi.
Elinye inina uCathrine Mawuyakufa uthe ubonga inina leli ngokuchaza lokubeluleka ngobubi boku-bleacher.
“Siyabonga ngokwabela uzulu amazwi enhlakanipho azanceda abanengi,” utsho njalo.
URutendo Sopa yena uthe: “I-bleaching ifana xathu lokubulala ufuna ukwenza imali ngoba uyabe ufuna ukuthatha okungasi kwakho okucina kukunika uhlupho.”
Omunye uChris Shorai Muzungu uthe: “Lingadlali ngamazwi akhe. Ulesibindi umama lo ukuze aphumele egcekeni akhulume izinto eziyangisa kangaka. Umama lo kumele ancediswe abe lenhlanganiso kumbe abe lohlelo lokulimukisa abantu ngobubi boku-bleacher. Ngiyakholwa ukuthi inhlanganiso leyo izancedisa abanengi ukulondoloza impilo zabo lejwabu labo eZimbabwe, kunye labamanye amazwe. Siyabonga ngokulimukisa abantu ukuthi baqakathekise ijwabu labo elinsundu ngokubafundisa ngobubi boku-bleacher ukuthi uyaba lemvukuzane, lokuthi uyaba lejwabu elitshwabheneyo njengelesalukazi usesemutsha.”
UJabson Marumbeyi uthe: “Abesilisa abanengi abalandaba lobuhlophe babesifazana. Abesifazana yibo nje abanikana i-pressure nxa befuna ukuncintisana. Isixwayiso esikhulu engisipha abesifazana yikuthi gezani libe bahle, lizithande, sebenzani nzima libe lemali zenu lekele ukulindela eyamadoda ngoba ungathanda umuntu ngoba ufuna akugcine ucina uzipha umthwalo onzima usuncitshwa imali yakhona.”
Kusenjalo inhlanganiso yeMedicines Control Authority yeZimbabwe (MCAZ) ihlala ixwayisa uzulu ukuthi ehlukane lomkhuba wokusebenzisa imithi engabhaliswanga emthethweni njengendlela yokulondoloza impilakahle yabo.
