admin
YiNtatheli kaMthunywa
UMGADLI weqembu leHighlanders uObadiah Tarumbwa uthi kulisizini ufuna ukubonisa amanye amathimu izibunu zenyoka ngoba uhlose ukuhlohla amabhola edlula amatshumi amabili.
UMthunywa ukhulume lo-Tarumbwa, umgadli othenjwe yiBosso kulisizini ngesikhathi iqembu leli liqeda ukulolonga phakathi kweviki.
Ubike ukuthi ngokuphenduka kwakhe kuleliqembu kumele ahlohle amabhola azancedisa ukuthi iBosso ibeyingqwele lonyaka.
UTarumbwa ungene kumdlalo wakhe wakuqala walithela emambuleni ngemizuzu emibili ethole ibhola ngesikhathi iBosso idlala leCaps United ngeSonto.
Ebuzwa ngenhloso yakhe njengomgadli othenjiweyo, uTarumbwa uthe manengi amabhola azasukumisa abasekeli.
Ngizawahlohla amabhola afunwa ngabantu. Ngikhangelele aphezulu kwe-20 njalo amabhola la kumele aphakamise iHighlanders ibeyintshantshu.
“Sengananzelela ukuthi nxa ungumgadli kumele uqine ngokuhlohla kuphela,” nguTarumbwa lo.
Utshele iphephandaba likazulu ukuba kasoke adanise abalandeli beTshilamoya.
“Iqiniso elikhona yikuthi abaqeqetshi bethu basikhuthaze ukuthi singadlalisi amathuba okuhlohla kuyo yonke imidlalo. Ungezwa umqeqetshi esithi ufuna amabhola emambuleni, kutsho ukuthi sihlose okukhulu kulisizini.
Umqeqetshi weHighlanders uBongani Mafu uthe kafuni ukutsho okunengi ngokudlala kuhle kwabafana bakhe.
“Isizini isaqalisa. Imidlalo isesekhona ngakho singahle sizikhukhumeze, kungasihlupha phambili.
“Ukuqhubekela phambili sinqoba kubalulekile,” nguMafu lo ongafunanga ukuthi akhulume okunengi ngomdlalo kaTarumbwa.
UTarumbwa uzatshibilika phambili lapho iBosso ebiswela umgadli obukhali ozawathela phakathi.
Umdlali lo wasuka kulithimu ngo2008 esiya kwele-Europe ngesikhathi iBosso iqeqetshwa nguMethembe Ndlovu.
Kusukela lapho, ithimu yezwe lonke ibingelaye umdlali okhuthalele ukuhlohla njengoTarumbwa.
“Ngisesekhona kuBosso. Ngifuna ukuqalisa isizini ngesivuvu. Iqembu akumelanga lidanise abasekeli. Sidlala kanje ngenxa yosekelo lwabo, ngakho sizabathabisa kumidlalo yonke.”
Ngesizini ka2014 uTarumbwa uncengise kuBantu Rovers kodwa wehluleka ukuphakamisa ithimu le esidlala ku-Division 1.
Online Reporter