admin
IQEMBU leTottenham Spurs selibike ukuba selixotshe umqeqetshi walo uJose Mourhino.
Lokhu kuza ngesikhathi kusele amalanga ambalwa ukuthi iTottenham Spurs idlale leqembu leManchester City kunkezo ye-Carabao enkundleni yaseWembley.
Ekhuluma lentatheli ngoLwesibili, umgcinisihlalo weTottenham Spurs uDaniel Levy uthe baxotshe uMourhino lequla lonke abesebenzelana lalo ebhentshini labaqeqetshi.
Uthe loba bethethe lelinyathelo, kube buhlungu ukwehlukana loMourhino.
“UJose labasekeli bakhe bebelathi ngesikhathi iqembu lisebunzimeni,” kutsho uLevy.
“UJose ubephatha umsebenzi wakhe ngobuciko. Utshengise ukubekezela lokwethembeka ngesikhathi sobhubhane lweCovid-19. Mina ngokwami ngakholisa ngafunda okunengi kuye. Angijabuli ukuthi isimo sinje. Nxa engafisa ukuphenduka, sizakwamukela.”
UMourhino oleminyaka yokuzalwa engu-58, waba ngumqeqetshi weTottenham ngemva kokusuka kukaMauricio Pochettino ngoLwezi ka2019.
Umdlalo wokucina kaMourhino ubungoLwesihlanu lapho iTottenham ebambane leEverton nge 2-2. Okwamanje iTottenham ihleli kunombolo yesikhombisa kulogu. Inhloso yayo yikuthi ifike kunombolo yesine ukuze ingene kumincintiswano yaphezulu.
Kubikwa umqeqetshi ozaqhubeka nguRyan Mason encediswa nguChris Powell. ITottenham ingaqhatsha umqeqetshi weqembu le RB Leipzig uJulian Nagelsmann ngesizini ezayo. – Ubulembu
Online Reporter