admin
YiNtatheli kaMthunywa
ABALANDELI beqembu le-Azam baphezulu kwenjabulo kulandela ukuzwa ukuba umdlali wabo othandwa kakhulu uPrince Dube usengeze isivumelwano sokudlala kuleliqembu ngeminyaka emibili.
UDube, ofike ku-Azam wabayintshantshu yokuhlohla amabhola, kazange athandabuze ukusayina leqembu leli kuliviki, okube yisitshengiselo sokuthi uzimisele ukuhlala ezweni leTanzania.
UDube, oleminyaka yokuzalwa engu-24, usegaxe entanjeni amabhola alitshumi lane (14) kuligi njalo kukhangelelwe ukuthi athathe isicoco sokuba ngumdlali ohambe phambili kulabanye ngokuhlohla.
Ihofisi ebona ngezokukhitshwa kwembiko ku-Azam ithe iqembu liyajabula ngokuvuleka kwelinye ithuba lokusebenza loDube.
“Iqembu le-Azam FC libika ngokujabula ukwengeza ikhontileka ka-Prince Dube oweZimbabwe ngeminyaka emibili. Isivumelwano lesi sitsho ukuba uDube uzabe eku-Azam kuze kufike isizini ka2024,” kutsho leliqembu.
Iphephandaba likazulu lenelise ukuxhumana loPrince ngoLwesibili ebulenjini lapho abike ukuba isizatho sokwengeza ukuhlala ku-Azam sivele ekutheni uphethwe kuhle.
“Bengilakho ukuthi ngiye kwamanye amaqembu kodwa lapha ngihlezi kuhle. I-Azam ingigcinile. Ngiyasuthiseka ukuba kuleli iqembu.
Umgadli lo, osebizwa ngokuthi ngu-Beast kulelo, ubekhangelelwe ukuthi aye kuqembu le-Young Africans elidlala kuligi efanayo. Ithimu le kubikwa ibithembise ukuthenga umdlali lo ngemali eyedlula leyo ayiphiwa ku-Azam.
Online Reporter