UPrince usekhona . . . izagcwala phamu iBF

YiNtatheli kaMthunywa
ABALANDELI beHighlanders sebezayibona ithimu yabo eyanqoba iDynamos kumaviki amathathu adluleyo.
Ibilindwe ngabomvu ithimu le ukuthi ize eMagumeni eBarbourfields itshengise ukuthi yenelisa njani ukudla isitha esiyiDeMbare.

NgeSonto uzaphela umlindelo lo ngoba iBosso inxuswe yiHow Mine kumdlalo weligi yeCastle emagumeni.

Kulumdlalo kukhangelelwe ukuthi abasekeli beHighlanders bayigcwalise phamu inkundla ngoba kusakholiswa kulimuli yabasekeli bethimu yezwe lonke.

Ziyadibana zombili zingomakhelwane kodwa kungaziwa ukuthi iyozala nkomoni. Okudonsa amehlo yikuthi umqeqetshi weHow Mine uKelvin Kaindu uzamelana lethimu ayiqeqetsha ngo2014. Umqeqetshi lo wasuka kulithimu esathandwa ngabasekeli bayo njalo eyitshiye idlala kuhle.

IBosso yona isuka kumdlalo omkhulu inqobe iDynamos, okukhangelelwe ukuthi nxa idibana lezimbamgodi zeHow Mine, kubelula ukuthi inqobe.

Ngokudlala kwamaqembu la ngesizini edluleyo, kusegcekeni ukuthi kuzadabuka ibhulugwe ngeSonto. IHighlanders angeke izitshele ukuthi iyabusa njalo layo iHow Mine kunzima ukuthi ibelethemba lokuphuma ihlekelela eMagumeni.

Ngempelaviki edluleyo iHow Mine idlale yaba ngutshiki lobhanqa 1-1 leTsholotsho. Ingabe yehluleka ukunqoba kodwa ithimu le ilakho ukunikeza iBosso umthwalo enkundleni yeBF ngoba yiyo inkundla ethakazelelwa nguKaindu.

Okungasiza iHow Mine yikuthi iBosso ixegise esiswini senkundla ngoba yikho lapho uKaindu abukhali khona.
Inkamba yeBosso ibika ukuthi umgadli uRahman Kutsanzira ulimele kukanti uKing Nadolo loBruce Kangwa bakumaWarriors kumkhankaso weCosafa Castle Cup eNamibia. Akwaziwa ukuthi bengayibamba impembe yehola lesithathu emini ngeSonto njengoba amaWarriors esephumile kulinkezo.

Ukaputeni weBosso uFelix Chindungwe uyavuma ukuthi iHow Mine ayisithimu yokudelela.

“Loba imidlalo yethu ibimisiwe, asizange siyekele ukulolonga. Umdlalo siwulungiselele sibili.

“Njengoba ngihlala ngisitsho ukuthi kuHighlanders akulaqembu esilidelelayo, umdlalo lo siwulungiselele.

Ngokunanzelela imidlalo edluleyo, iHow Mine ikhanya iliqembu elihlangeneyo njalo alitatazeli. Abadlali bayo bayazi ukuthi badlalela ukunqoba.Lathi sizazama ukuqhubeka ngokunqoba esikwenzayo. Sikhangelele imiklomelo yonke ngeSonto,” nguChindungwe lo.

Kweminye imidlalo kumaqembu akuluhlu olungezansi yelizwe, iBulawayo City inxusa iHarare City eBF ngoMgqibelo.

ITsholotsho ingena umango omude iqonde umdlalo leZPC Kariba. IHwange izabe iseTriangle. Abafana abaphuma ebholohweni iBorder Strikers yamukela iChapungu enkundleni yeMaglas.
Imidlalo yeCastle PSL kulimpelaviki:

NgoMgqibelo: Bulawayo City v Harare City (Barbourfields), ZPC Kariba v Tsholotsho (Nyamhunga) NgeSonto: How Mine v Highlanders vs (Barbourfields), Dynamos v Ngezi (Rufaro), Border Strikers v Chapungu (Maglas), Triangle v Hwange (Gibbo), Mutare City Rovers v CAPS United (Sakubva).