admin
Thokozile Mbedzi
LAPHO abanye abazali besithi ukuzala yikuzembela, kulekhehla leCollen Bawn elithuka usuku okwazalwa ngalo indodakazi yalo nanko phela ilipikisa ligqoke ezalo njengoba imdingele iziqhwanga zamadoda zambhaxabula isithi lisuke emzini kanina.
UMthunywa uzwe ukuthi uSiyengiwe Ncube olizalibelethwe wafika ebusuku uyise uHassan Phiri (77) eselele lamadoda amabili baqala ukutshaya intuba bethi uyise kavule.
Ekhuluma lentaleli kaMthunywa uMnumzana Phiri uthe uSiyengiwe lamadoda amabili labantwabakhe bafika bakwatula amasango bangena baqala ukumtshaya besithi asuke emzini lo. “Bangitshaya ngesidindi sehloka kanye lemikhonto andubana bangibophe izandla lenyawo bangiphosele emoteni. Ngibona angathi babefuna ukuyangibulala kodwa ngasila ngoba kwathutsha omunye umfana.”
UMthunywa uphinde waxoxisana loSiyengiwe othe uyise nguye owayefuna ukumtshaya.
“Ubaba wayengafuni ukusivulela yikho abafowethu abazama ukumbamba esefuna ukusitshaya yikho lapho ahluzuka khona.
“Samthatha samfaka emoteni samhambisa emapholiseni kuphela ngoba ubesitshaya. Sivele kasihlalisananga kuhle lapha ekhaya,” kulandisa uSiyengiwe.
USobhuku uEnock Sibanda ebuzwa ngodaba lolu uthe yena wezwa kuthiwa balwile.
Ukhansila wakulindawo uMary Mpofu uthe kulihlazo ukuthi umntwana atshaye umzali wakhe.
“Njengomzali ngizwa ubuhlungu ngoba kubi ukubona umuntu omdala ehlukuluzwa ngumntanakhe emxotsha emzini wakhe,” utsho njalo.
Online Reporter