admin
Thokozile Mbedzi
ZILOKHE zibabaza zingaqedi izakhamizi zakoSigola eFort Rixon ngemva kokuba usane olulomnyaka owodwa luwele phakathi kwenkonxa lwafa, uMthunywa ukuzwile lokhu.
Umuyi uPatience Moyo obelomnyaka lenyanga ezintathu ugalule enkonxeni ngeviki ephelileyo endlini abalala kuyo elogogo wakhe.
Ekhuluma lentatheli kaMthunywa uNkosazana Sehlisiwe Ncube uthe lokhe belesithuli ngendlela uPatience abhubhe ngayo.
“UPatience wayesendlini abalala kuyo logogo wakhe. Asazi mhlawumbe wathi edlalisa amanzi wasewela phakathi kwenkonxa eyayilamanzi.
Uqhubekele phambili njalo esithi abantwana bayakuthanda ukudlalisa amanzi njalo kukhanya imbedumehlwana le yenzakala ugogo elibele.
“Kukhanya ugogo wayebona angathi umntwana uyazidlalela kodwa ngokuswelakala kwenhlanhla wasewela phakathi kwenkonxa egcwele amanzi wafa,” kulandisa uNkszn Ncube.
Isikhulumi samapholisa esabelweni seMatabeleland South ulnspector Philisani Ndebele ebuzwa ngodaba lolu uthe solufikile ewofisini yabo.
“Samukele umbiko wosane oluwele phakathi kwenkonxa lwagalula ngakho sithanda ukuxwayisa uzulu ukuthi ngaso sonke isikhathi kumele abekwazi ukuthi abantwana bangaphi ukuze kwenqatshelwe ingozi ezifana lale,” kuphetha uInsp Ndebele.
Online Reporter