admin
USAZOHLALA amasonto engalithinti ibhola umdlali weKaizer Chiefs, uKhama Billiat, obengekho ngoLwesithathu iqembu lakhe litshaywa yiChippa United nge1-0.
Umgadli lo odabuka eZimbabwe, walimala ingqagala kumdlalo, ezakhe zitshaya iMamelodi Sundowns.
Bekungakapheli sikhathi esingakanani ebuye ekulimaleni umlenze omhlalise izinyanga ezintathu.
Kubuzwa uGavin Hunt ngesimo sikaBilliat ngemva kokudliwa ngamaChilli Boys, uthe: “Angilaso isiqiniseko sokuthi uzabuya nini. Ulenkinga kulo umlenze ayephuke kuwo. Njengoba siba lemidlalo ezinsukwini ezimbili loba ezintathu, angahlala amasonto amabili kusiya kwamathathu. Uzophuthwa yimidlalo eminengi futhi. Kubi, akakwazi ukuhamba.”
Ngemva kokuthi ngeledluleyo ezikaHunt ziphule irekhodi leMamelodi Sundowns lokungatshaywa emidlalweni engu-21, abemakhulu amathemba okuthi koweChippa zizaqhubeka kakuhle.
IChiefs ilwela ukuqeda isizini ikuTop 8 njengoba yehlele endaweni yesitshiyagalolunye ngemva kokwehlulwa.
UHunt ubengakwazi lokuphendula imibuzo yezintatheli ngokuthi kwenzakaleni emdlalweni weChiefs. Akandanga ngamazwi kodwa wasola iqembu ngokuyekela umdlalo bewuphethe.
“Uma usebenzisa amathuba uyanqoba. Thina silenkinga, besikhonya emdlalweni kodwa kasihlohlanga.
Esikwenzileyo kungaphezu kwezibalo. Uma ulazi ibhola uzangizwa ukuthi ngiqonde ukuthini. Ibhola besilibamba kakhulu, singafuni ukukhahlela. Sibulawe amabhola okucina ebhokisini lezitha. Uma ufuna ukunqoba, uyazi ukuthi udinga ukumvivinya unozinti. Lokho asikwenzanga. Senze iphutha elilodwa sase sihlohlwa. Kumele siyibongele iChippa,” kutsho umqeqetshi lo.
KuChippa, uHeric Vladislav ukuqinisekisile nguye ongumqeqetshi kuleli qembu. Ngesikhathi ethulwa kwabezindaba kwathiwa uzoba ngusomaqhinga. Kodwa ubesehleli ebhentshini emdlalweni weChiefs.
IChilli Boyz ilwela ukuvika izembe, ibambe inombolo yesi-15 kulogu ngemiklomelo engu-21. Isalelwe yimidlalo emihlanu ukuqoqa imiklomelo ezayifikisa ihlale esigabeni esikhulu.
“Kumele siqhubeke ngendlela esidlale ngayo. Ngilethemba lokuthi emdlalweni wethu olandelayo sizaphinda siqoqe apheleleyo. IChiefs isinike umdlalo onzima, ibiliqembu elilukhuni ukulitshaya,“ kutsho uHeric. – Ubulembu
Online Reporter