admin
YiNtatheli kaMthunywa
OWAYENGUMONGAMELI welizwe leZimbabwe uKhomuredi Robert Gabriel Mugabe kasekho.
Ubeseleminyaka yokuzalwa engu-95.
Ilizwe leZimbabwe ngoLwesihlanu lehlelwe liyezi elimnyama kusabalala umbiko wokukhothama kukaKhmrd Mugabe.
UKhmrd Mugabe ubhubhe ngemva kokugula isikhathi eside njalo ubeselatshwa elizweni leSingapore.
UMongameli welizwe uEmmerson Mnangagwa, wethule kunkundla yokuxhumana yeTwitter umbiko wokwedlula kukaKhmrd Mugabe.
“Ngilusizi ukuthi ngilethulele ukuba ubaba wesizwe seZimbabwe njalo owayenguMongameli welizwe uRobert Mugabe kasekho,” kutsho uMongameli uMnangagwa.
“UKhmrd Mugabe wayeliqhawe likazibuse, njalo engomunye wabakhokheli bakusizwekazi seAfrica owanikela impilo yakhe ukukhulula abansundu kanye lokubanika amandla okuzithuthukisa.”
UKhmrd Mugabe waphosa phansi ijogwe lokubusa ngenyanga kaLwezi ngomnyaka ka2017.
Imbiko yokufa kukaMugabe isabalala, amazwi enduduzo aqale ukuthululeka evele endaweni ezehlukeneyo. Ibandla le African National Congress (ANC) lelizweni leSouth Africa lithe owayenguMongameli welizwe wazinikela impilo yakhe ukusebenzela abantu bakibo.
“I-African National Congress ikhala ndawonye lesizwe seZimbabwe ngokwedlula emhlabeni komfowethu uKhomuredi Robert Gabriel Mugabe, obhubhe ngemva kokunikela impilo yakhe ukusebenzela ilizwe lakibo kanye labantu,” kutsho uNobhala jikelele weANC uMnumzana Ace Magashule.
Online Reporter