admin
Nkosilathi Sibanda
KUVUKA impi ekade yathula enkundleni zenguqu yakuleli ngeSonto mhla kudlala iDynamos leHighlanders kunkezo yeChibuku.
Lumdlalo udonsa amehlo ngoba udibanisa amaqembu amakhulu kuleli, okuthi nxa kukhulunywa ngemqhudelwano, angeke atshiywe phandle.
Kodwa kubalandeli beBosso ubukhulu balumdlalo buzakhulelwa yikuza komqeqetshi omutsha uHendrick Pieter de Jongh.
Umqeqetshi lo uzaqala ukukhuza iqembu phambili kwabantu kulumdlalo we-Dynamos ngokutsho komgcinisihlalo uKenneth Mhlophe.
Kungxoxo abelayo lephephandaba likazulu ngoLwesithathu ekuseni, uMhlophe uthe umqeqetshi uzabonakala kakuhle mhla welanga lenkezo yeChibuku.
“Umqeqetshi usekhona. Sikhangelele ukuthi kusiyafika ilanga langeSonto abeseqalile umsebenzi,” kutsho uMhlophe.
Abalandeli beHighlanders abakhulume lephephandaba likazulu bathe bafuna ukumbona mathupha umqeqetshi omutsha.
“Usekhona uDe Jongh? Sifuna ukumbona. Sizwa ngamaphephandaba ukuthi ukhona. Ukubuya kwakhe akube yikunqoba kweBosso,” kutsho uMlindeli Tshabangu ohlala eMatobo obukela iqembu leli kuyo yonke imidlalo. Omunye wabalandeli uJoel “Msipha” Ndlovu oseFolosi uthe:
“Inkokheli zethu, zenze kuhle ngoba lo umqeqetshi uzaletha okuhle. Imbali yakhe inhle.”
Kusenjalo, inhlanganiso yePremier Soccer League ibike ukuba imidlalo yenkezo yeChibuku yehlandla lakuqala iyaqhubeka.
Kweminye imidlalo, omakhelwane beHighlanders, iChicken Inn izadlala leManica Diamonds enkundleni yeLuveve.
Amaqembu amabili ancintisa kumqhudelwano weConfederation of African Football, FC Platinum leTriangle azaqhubeka kulumncintiswano kulimpelaviki.
Online Reporter