admin
Thokozile Mbedzi
KULENDODA esebenza komunye umgodi koSigola esele iphethe amathumbu ngezandla emsebenzini kulandela ukugwazwa ngumngane wayo oyilande emsebenzini.
U-Ishmael Muwururwa oleminyaka engu-45 kubikwa waxabana lomngane wakhe owamlanda emsebenzini wacina esemgwaza mhlaka 3 Nkwenkwezi loba kungasatholakalanga ukuthi kwakubangwani.
Kubikwa uIshmael lometheswacala okungasatholakalanga igama lakhe basuka bama bucwadlana kwabanye ngesikhathi bekhuluma kodwa akwaziwa ukuthi kwasuka kwathini waphenduka esephethe amathumbu ngezandla.
Omunye owayekhona lokhu kusenzakala uMnumzana Godfrey Mathe uthe lokhe bengelankani ngalokho abakubonileyo.
“UIshmael ubezisebenzela wafika wabizwa ngumetheswacala, bayakhulumela eceleni.
“Asazi ukuthi kusuke kwathini ngesikhathi bekhuluma kodwa sibone nje uIshmael esethutsha ethwele amathumbu ngezandla. Sonke silapha simadolonzima ngoba besingacabangi ukuthi umuntu angalanda umuntu emsebenzini ezomgwaza,” kuchaza uMnu Mathe.
“Ngesikhathi bekhuluma kakho owacabangela okubi, sasisithi bayazixoxela singazi ukuthi omunye uzatshona esesesibhedlela.
“Ngesikhathi efika lapho esasikhona wahle wawela phansi kazange abe esenelisa lokusilandisela ukuthi kuhambe njani ngoba wayengasenelisi ukukhuluma,” nguMathe lowo.
Isikhulumi samapholisa esabelweni seMatabeleland South uAssistant Inspector Thabani Mkhwananzi ebuzwa ngodaba lolu uthe solufikile ehofisini labo ngakho uzulu katshiyane lomkhuba wokuthwala izikhali ngoba akuvunyelwa.
“Uzulu kaxwayane lomkhuba wokuthwala izikhali ngoba kungavunyelwa emthethweni njalo nxa kusuke kwaba lengxabano kababikele amapholisa loba abaphathi bezigaba.
“Kucatshangelwa ukuba uIshmael wagwazwa ngengqamu yohlobo lwe-okapingoba yiyo eyatholakayo lapho abaxabanele khona. Sicela uzulu aphathise ngokwazisa amapholisa loba ukutshaya ucingo ukuze umagwaza abotshwe,” kuphetha uAsst Insp Mkhwananzi.
Online Reporter