admin
UKUVULWA kwemisakazo emitsha esemaphandleni kuzaletha ingqubekela phambili masinyane ngoba izakhamizi zizakwazi ukuthi zenelise ukuhlala phansi lenkokheli zilungisise okusilelayo indawo ngendawo.
Lokhu kuvele kumibono yezakhamizi ezihlala edolobheni leGwanda lalezo ezakhele kuziqinti ezisemaphandleni asesabelweni seMatabeleland South ngesikhathi kusethulwa ngokusemthethweni umsakazo we-Ntepe Manama Community Radio.
Umsakazo lo ngowakuqala osungulwe eMat South lokhe isizwe sathatha uZibuse ngo-1980. Izakhamuzi zincome uHulumende, ikakhulu ugatsha lwezokuphuma kwembiko lenhlanganiso yeBroadcasting Authority of Zimbabwe.
Indlela abantu baseGwanda abathabe ngayo ngokuvulwa kwe-Ntepe Manama Community Radio ibisemehlweni womuntu wonke obefike emcimbini wokunanza iWorld Press Freedom Day obuqoqwe yiMedia Institute of Southern Africa (Misa) lenkampani yokudla iLumelang Batho Milling Company.
Iphephandaba likazulu lixoxisane lezakhamuzi ezithile ezidabuka kulumhlubulo weMat South ezithe zigcwalelane ngenjabulo ukuzibonela mathupha ukuthi umsakazo wabo usukhona.
“Yisimangaliso lesi. Ngubani owayengathi iGwanda izakuba lomsakazo sisaphila? Siyakubongela lokhu okwenziwe ngababambe iNtepe Manama Community Radio,” kutsho usomabhizimisi uMnumzana David Moyo owenkampani yeLumelang Batho, egcwele iGwanda yonke.
“Umsakazo lo uzaphakamisa isizwe seMatabeleland South ngoba abantu bakithi bazakwazi ukukhuluma abakufunayo okuqondane labo lengqubekela phambili yabo. Lokhu sithi yiyo i-real development esebantwini.
“Kwezamabhizimisi, nanti ithuba lokufinyelela abathengi. Kuqakathekile ukuthi abantu abalamabhizimusi basekele inhlelo ezinje eziphakamisa indawo lapho abasebenza khona lomphakathi. Umsakazo lo uzathuthukisa abantu ngendlela esingakaze siyibone. Ngilethemba uzaqhuba kuhle.”
UMnu Moyo wengeze ngokuthi kuzabaluleka ukuthi iNtepe-Manama Community Radio ikhokhele ekulwisaneni lobugebengu emaphandleni, ikakhulu ukuhlukunyezwa kwabantwana abangamankazana.
UMnumzana Esnathy Nleya owe-Garanyemba uthe ubesediniwe ngokulalela eminye imsakazo engatsho lutho ngendaba zeGwanda.
“Uyazi kubuhlungu ukuthi uvule iwayilesi uzwe kukhala ingoma zakhonale khatshana. Thina sifuna ukuzwa okwakithi lapha eGwanda. Iwayilesi le entsha ngiyitshayela izandla sibili ngoba sesizakuzwa okuyikho.”
Izakhamuzi zithe zibeke umthwalo kuNtepe Manama Community Radio ukuthi ibabaze iphinde ikhiphe amacebo ngodaba lwamasela ezifuyo ezibalisa inkomo lobobabhemi.
UKhomuredi Dickson “Dididi” Ncube obike ukuthi ungumfuyi wenkomo eGuyu, uthe sebekhathele ngokulahlekelwa ngumnotho.
“Sizwa bethi imsakazo ilakho ukuqeda indaba ezinje. Singaqala ukukhuluma ngokutshontshwa kwenkomo sibambisene lamapholisa kuzanceda ukuqeda ubusela lobu,” kutsho uMnu Ncube.
UNkosana Refiloe Dube ongusomabhizimisi wasenzikini yeNtepe Business Centre utshele uMthunywa ukuthi ubona ibhizimusi lakhe likhula uma engasebenzelana lomsakazo omutsha lo.
“Lapha ngithi amhlophe kubantwabethu abakhokhela iNtepe Manama Community Radio. Singaba yini singabantu nxa singela ukuphumelela lokuzenzela. Ngokubona kwami, abantu abakubhizimusi njengami balakho ukuthi bakhulise imisebenzi yabo ngokusondelela umsakazo. Ukusakaza esikuthengisayo kuzenza sithole imbono engcono yokukhulisa ibhizimusi lethu,” kutsho uNkszn Dube.
Abalandeli bomsakazo lo kubikwa kwamanje bazawuthola ebulenjini kuphela ngoba usaqedisa umsebenzi wokuphanyeka imitshina yokuxhuma.
Online Reporter