admin
Ethel Ncube
ULUNGISELELA ukuyathwasa ongusaziwayo kwezokutayila (modelling) ngemva kokunanzelela ukuba ubizo lwakhe lusekuthwaseni kulandela ukuhlangana lezehlakalo ezitshiyeneyo empilweni yakhe esezimenze wabona ukuthi ngeke aluzibe lolubizo.
UMnumzana Khaya-elihle Khanye ongumqondisi wesikolo sokutayila okuthiwa yiTruth Models Academy uveze ukuba yena ubizo lwakhe uselwazi njalo ngeke alubalekele.
Ekhuluma loMthunywa uKhanye ongusomabhizimusi njalo efundisa ngezokutayila uchaze ukuba sowalwamukela ubizo lwakhe.
“Ngiyazi ukuthi kunzima ebantwini ukuthi bazwisise uhambo lolu esengilukhethile kodwa ngikubone kufanele ukuthi ngiyethwasa ngoba ngiyazi ukuthi lolu yilo ubizo lwami.
“Ngibone kufanele ukuba ngiyethwasa ngemva kokuba ngibone kusenzakala okuthile empilweni yami okugoqela izinhlupho kanye lokugula okungacaciyo ngakubona ukuba sokumele ngiyethwasa.
“Isinqumo lesi ngisithethe ngikhokhelwa njalo ngabadala abangitshengise indlela okumele ngiyihambe kuhambo lolu.
“Ngiyazi kunzima njalo akujwayelekanga ukuthi umuntu owenza umsebenzi wami ayethwasa kodwa ayikho enye indlela, ngingumuntu omnyama njalo nxa ngilobizo kumele ngisabele ngingaluzibi,” kutsho uKhanye.
Uqhubekele phambili echaza ukuba ukuyathwasa kwakhe abantu akumelanga bakuthathe ngendlela engayisiyo.
“Abantu akumelanga lokhu bakuthathe ngendlela engayisiyo. Ngizahamba ngiyethwasa ngiphenduke, emsebenzini wami angiwutshiyi. Abalandeli bami ngithanda ukuba bazi ukuthi ukuthwasa kwami akusoze kutshintshe lutho njalo lami akungitshintshi.
“Ngizaqhubeka ngingumqondisi wezokutayila njalo ngincedisa bonke abafuna ukutayila. Konke kuzaqhubekela phambili. Ngikhuthaza uzulu ukuthi azwisise ngokuthwasa lokhu, bangangahluleli ngendlela engayisiyo ngoba lolu lubizo engingeke ngiluzibe,’’ kuphetha uMnu Khanye.
Online Reporter