adminFairness Moyana
KULENINA leBinga elibonga amadlozi akwabo kulandela ukutholakala engelacala lokuncedisana lomkalo ukuthi adlove umnawakhe ngenhloso yokuthi athathe umfazi wesibili.
Umsolwa oleminyaka yokuzalwa engu-25 esingeke samveza ngenhloso yokuvikela umamangala, weLusulu eBinga ubesetheswa icala lokudlwengula umnawakhe oleminyaka yokuzalwa engu-15 ndawonye lomkakhe uOvias Dube.
Ngokwesiko lesiTonga owesilisa angahlangana emacansini lomlamu wakhe kasavunyelwa ukumxotsha uhle abe ngumkakhe.
Ubufakazi bukamamangala yibo obenze umsolwa watholakala engelacala nanko phela uthe udadewabo wayengekho ngesikhathi edlwengulwa nguDube.
Umantshi uNkosikazi Dambudzo Malunga weHwange Regional uthe ubufakazi bukamamangala kanye lobukaDube yibo obenze watholakala engelacala.
Kusenjalo uDube olandule icala lokudlwengula umamangala esithi babevumelene yena kazange abe lenhlanhla ngoba umantshi umuphe isigwebo sokuyapika ejele okweminyaka engu-15. Phakathi kweminyaka le wesulelwe iminyaka emithathu.
UDube ubikele inkundla ukuthi yena lomamangala bebethandana njalo ngalelolanga wahlangana lomamangala ngoba udadewabo wayengekho.
“Nkosi, kangizange ngidlwengule umamangala, sasivumelene. Umkami wathi esiyageza ngabizela umamangala endlini yami yokulala savumelana ukuthi sihlangane emacansini njalo ngangihlose ukubikela umkami ukuthi ngifuna ukuthatha udadewabo ngoba lokhu kuvunyelwa kithi,” kutsho uDube.
Umtshutshisi kulelicala uMnumzana Tawanda Sigauke ubikele inkundla ukuthi mhlaka 22 Mabasa ngehola lesificamunwe munye ebusuku uDube lomkakhe bangena endlini yabo yokulala batshiya umamangala emkulwini.
Ngemva kwesikhatshana ababili laba babiza umamangala wathi engena uDube waqala ukumphulula andubana amfuqele embhedeni.
Kubikwa umamangala ukuze azohlala labo wayecelwe ngudadewabo ukuthi azomncedisa ukuvuna.
Kubikwa mhlaka 23 Mabasa udadewabo kamamangala wambisela ngakibo andubana amlaye ukuthi angatsheli muntu ngalokhu okwakwenzakele. Kusenjalo udaba lolu lwavela ngelanga elifanayo ngemva kokuba unina emuzwe ekhala endlini yakhe yokulala.
Ngemva kokumbuzisisa ukuthi ukhalelani umamangala waveza ukuthi uDube wayemhlukuluze emacansini okwenza indaba le yahle yayabikelwa amapholisa abopha uDube.
Online Reporter