admin
YiNtatheli kaMthunywa
IZAKHAMIZI zelokitshini leLwendulu, eHwange zisele zikhuza imihlolo ngoMvulo kuviki edluleyo ngemva kokuba omahotsha behlubule izigqoko andubana bagide kube luthuli emngcwabeni womunye wabo bethi bayamvalelisa.
Omahotsha laba abathathu abavezwe ngokuthi nguMaria, Anita kunye loGracious okungasatholakanga izibongo zabo kubikwa benze ihlazo leli phambi kwabantu akade bebuthene bezobeka isihlobo sabo Name.
Umfakazi okhulume loMthunywa uMnumzana Darlington Moyo uthe babukela ibhayisikopo yamahala ngapha bedliwa zinhloni ngesikhathi kungcwatshwa omunye okucatshangelwa ukuthi ubengumahotsha kulindawo.
“NgoMvulo kuviki edluleyo bekulomngcwabo womunye wabaphila ngokuthengisa imizimba yabo. Emngcwabeni lo kube yisimanga kuye wonke umuntu obethe gwaqa nanko phela abanye bakhe bacele ukukhipha ibhokisi likamuyi emoteni.
“Ibhokisi selingeniswa egodini baqala ukwenza imitshikatshika yabo nanko phela bahlubula izigqoko sabantu abafikelwe ngumoya othile, baqala ukugida kwaba luthuli,” kutsho uMnu Moyo.
Uqhubekele phambili wathi omahotsha laba kwakungabethusi ngitsho ukuthi banqunu emangcwabeni.
“Omahotsha bakhipha iziketi basala begqoke ama skin tight phezulu begqoke amabhodi. Abanye omama bazama ukubabamba kodwa basebengathi bafikelwe yimimoya yamadimoni ngoba baze bacina bebanjwa ngabanye obaba ababaxotshayo,” kulandisa uMnu Moyo.
Esinye njalo isakhamuzi esithande ukwaziwa ngokuthi nguMangwiro nje kuphela sithe omahotsha laba bavele bakwejayele ukwenza imikhuba le ikakhulu nxa betshiywe ngomunye wabo.
“Omahotsha laba behlisa isithunzi samanina ngoba indlela abenza ngayo itshengisa ukuthi abahloniphi ngitsho umufi. Amanina enza kanje kumele abotshwe ngoba umthetho awukuvumi ukuthi umuntu abonakale enqunu emphakathini. “Kungasi zakhamizi ezabamba omahotsha laba ngabe sabona okukhulu,” kuphetha uMnu Mangwiro. KoBulawayo lakho kuke kwaba labomahotsha abamangalisa izakhamizi kubhubhe omunye wabo njengoba bathatha ibhokisi lakhe baya emabhawa lapho umuyi ayevakatshela khona esaphila bethi bafuna avalelise indawo abethanda ukusebenzela kizo.
Online Reporter