Online Reporter
YiNtatheli kaMthunywa
KULENDODA eleminyaka engu-24 yokuzalwa yakuVillage 8, eDombodemba, esigabeni seBulilima esabelweni seMatabeleland South ethumbe intombi eleminyaka engu-18 yokuzalwa, yahamba layo endlini yayo andubana iyidlwengule okwensuku ezimbalwa iyikhiyele.
UWonder Lutho Ncube umiswe phambi kukamantshi wePlumtree uMnumzana Joshua Nembaware esetheswa icala lokudlwengula.
Kazange anikwe ithuba lokukhuluma kodwa icala lakhe lidluliselwe kumhlaka 6 Mfumfu, 2025 lapho umsolwa azabuya evela esitokisini.
Umtshutshisi kulelicala uNkosazana Sheila Nyathi uthe mhlaka 9 Mpandula kuwonalo umnyaka ilanga selisiya ngomtsha wendoda, umamangala wahlangana lometheswacala esiya ngakibo.
Kubikwa umsolwa waqala ukumbuza ukuthi uvela ngaphi wabuye wamtshela ukuthi ungunkosikazi wakhe, ethatha igunya ekuthini wake wabotshelwa ukumhlukuluza.
Inkundla izwe futhi ukuthi uNcube wawakala umamangala kabili ngamampama esihlathini sesandleni senxele andubana amlaye ukuthi amphelekezele emzini wakhe kodwa umamangala wala.
Umsolwa wadobha ugodo wethusela umamangala ngokumbhaxabula ngalo nxa engaqhubeka esala okwabangela ukuthi alandele ayekutsho.
Kubikwa umsolwa wahamba lomamangala endlini yakhe wafika wamvalela endlini yakhe yokulala wathembisa ukumbulala nxa angazama ukubaleka.
Umsolwa wabamba ngamandla umamangala ukuthi ahlale endlini yakhe kusukela mhlaka 9 Mpandula kwaze kwafika umhlaka 13 Mpandula ngo 6 ekuseni.
Ngalezonsuku umsolwa wayebamba ngamandla umamangala ukuthi baye emacansini kathathu ngezikhathi ezehlukeneyo bengavumelananga.
Kubikwa engakamkhululi, umsolwa wamthathela impahla zakhe kunye lomakhalekhukhwini wakhe ukuze kube yisibambiso sokuba uzaphenduka wamnika ezakhe ukuba agqoke zona.
Umamangala wahamba ngakibo wafika wabikela ugogo wakhe ngokwakumehlele, waveza lokuthi umsolwa umthathele impahla kunye lomakhalekhukhwini wakhe.
Mhlaka 20 Mpandula ngehola lika 8 ekuseni umsolwa wahamba ngakibo kukamamangala wafika wavula ngamandla ikhiye wangena waphosela izigqoko zikamamangala andubana afulathele.
Indaba le yabikwa emapholiseni okwenza umsolwa wabotshwa.
Umamangala kwathiwa aye esibhedlela sePlumtree District hospital ukuze ayehlolwa kwabhalwa umbiko wesibhedlela ozasetshenziswa njengobufakazi emthethwandaba.
