adminYiNtatheli kaMthunywa
NGEMVA kokuthola isithupha esiphezulu kwezokuqeqetsha inguqu, umqeqetshi weBulawayo Chiefs uThulani Sibanda usethusele ngokuthi lonyaka uzayithwala inkezo yeligi ka-Division One.
USibanda utshele iphephandaba likazulu kuliviki ukuba uselolwazi olujulileyo ngokumele akwenze nxa efuna ukungenisa iBulawayo Chiefs kuligi ephakemeyo ngemva kokuphatheka kuzifundo zeScottish FA C license edolobheni leCape Town.
Umqeqetshi lo uphezu kokubala ingwalo zesithupha seUefa B njalo ekupheleni kwalisizini.
“Kulandela ukudlala esakwenza ngesizini yomnyaka ka-2015, ngikholwa ukuthi lonyaka sizakuba esibangeni esiphezulu. Sengitshintshe indlela engiqeqetsha ngayo ngokufundisa abadlali bami okutsho engikuthole kuzifundo zeScottish FA. Sengifunde okunengi ngenguqu okungaziwa ngamanye amathimu.
“Ngikholwa ukuthi lo ngomnyaka wethu. Sisebenza gadalala okokuthi angiboni sisehluleka ukunqoba lonyaka.
Amaphutha esawenza ngo-2015 akumelanga aphindwe,” kutsho uSibanda.
Umqeqetshi lo uthe wezwa ubuhlungu ngokwehluleka ukuthwala inkezo yeligi.
“Siqede umnyaka odluleyo sidlala ibhola lethu siphelele kodwa kwehlula. Ngezwa ubuhlungu sibili, okuyikhona okwenze ngabuyela esikolo sobuqeqetshi.”
IBulawayo Chiefs isitshengisele ukuthi ingelinye yamaqembu okubukela kulisizini ngoba iqale amalungiselelo ayo masinyane, amanye amathimu esasekukhefu.
Iligi yeZifa ka-Division One kulumhlubulo welizwe iqala kunyanga kaMabasa.
Abadlali abathengwe yithimu le babalisa umgadli uStanley Ngara. Umdlali lo ubeyinsika yokuphumelela kweqembu leBlackboots okwemasizini amanengi. USibanda uthe ukhethe ukugijimisa umdlali lo ngenxa yokuthi ufuna ukuthi ancedise ukubhoboza umambule kuyo yonke imidlalo.
“Ngaphandle kukaStanley Ngara, abanye abadlali esibathengileyo nguMengezi Dube loTrust Moyo angababona betshibilika kuhle eqenjini leNtabazinduna nyakenye. Nxa sesihlanganisa lethalenta esilalo, iBulawayo Chiefs izakuba liqembu eliqine kakhulu.”
Online Reporter