admin
Khanyile Ndebele
UKUZAMA ukunceda abantu belodubo, kutshiye omunye umtshayeli wakoBulawayo engasela mota nanko phela amadoda amathathu awathwele ethi uyawanceda acine emtshontshela imota.
Umamangala okugodlwe igama lakhe, kubikwa mhlaka 15 Mpalakazi ngehola lesikhombisa ntambama wahlangana lamadoda amathathu ayedinga izimota ezingena edolobheni esuka eSauerstown wawapha inyawo ezilula engazi ukuba usezipheke ngebhojwana.
Kubikwa abetheswacala laba, omunye wahlala phambili ababili bahlala emuva. Bathe besendleleni laba ababehlezi emuva bakhipha ingqamu zomhlobo wama-okapi ethusela umtshayeli emtshela ukuthi afuna imota.
UMthunywa uzwe ukuba omunye wabo wamkhwathaza lumtshayeli wathatha umakhalekhukhwini wohlobo lwe-Vodafone lesikhwama semali esasilemali engangeUS$30 le$700 kunye lesithupha lecence lakhe lokutshayela.
Beqeda lapho bambopha ngentambo yezicathulo, batshayela imota beqonde eRichmond lapho abafika bamtshiya khona egangeni.
Isikhulumi samapholisa koBulawayo uInspector Abednico Ncube uthe abahamba ngezimota kumele baqaphele emgwaqweni ngoba izigebengu sezizinengi.
“Njengamapholisa sithanda ukuxwayisa bonke labo abahamba ngezimota ukuthi baqaphele izigebengu emgwaqweni. Ukuthwala abantu ngezimota kufanele kwenziwe kuphela yilabo abalemvumo yokuthwala umphakathi njalo kwenza uphephe ezingozini ezifana lale,” kutsho uInsp Ncube.
Kubikwa yonke imali eyatshontshelwa umtshayeli lo kugoqela lemota yi-US$4 085.
Online Reporter