admin
Silo Mehleli Dube
UDingindawo wasuka ebhekisa amabombo eGoli njengayo intsha enengi emhlubulweni weMatabeleland, kazange amelele impumela yemihloliso ayeyibhalile ezingeni lesine ku O-Level mhlawumbe wayekwazi ukuthi kadobhanga lutho.
Phela kwakuyisikhathi ondlebe zikhanyilanga besaphethe umbuso kweleMzansi, wachapha ngaphansi emfuleni ungulukudela ngoba incwadi zokuthi aye eGoli ngokusemthwethweni wayengelazo njalo lemali yakhona engelayo.
Waba lenhlanhla wafika wathola umsebenzi komunye umlungu ongumhlobo wesiGiliki. Ngenxa yokuthi wayekhuthele njalo esebenza epulazini ukunakekela izifuyo ezibalisa imbuzi, inkomo, izimvu kwaba lula kuye ngoba laye welusa kibo.
Abelusa izifuyo babephekelwa ngamantombazana amabili ayeqhatshiwe khonapho. Wasebenza okweminyaka thize, enye intombazane yasemikulwini, wayemuhle umntanomuntu, yamthatha amehlo, kwatshaya inhliziyo, yagcwala amakhaza.
Wayethi ludade nxa esiza lokudla uDingindawo aze aphumisele ethi ngifuna ube ngumama wengani zami, laye uTholakele amoyizele angaze atsho lutho, kodwa ukwenza kwakhe kukhomba obala ukuthi uyakujabulela ukuwezwa lawo magama.
Njengoba kuyizinto zakhatshana, baqala ukutshontshela ukungena ekamelweni lomunye njengoba babesebenza ndawonye. Dukuduku wazithwala uTholakele umlungu wakhe wathi embuza wavela wakhomba uDingindawo, wakujabulela lokho ngoba ekwazi ukuthi ngeke aphazamiseke emsebezini wakhe.
Lakanye bacela ukutshadiswa kunkonzo yomlungu wabo ngoba labo basebengena yona, batshada kulabangane lezihlobo ezimbalwa. Kwathi sebephiwe ikhefu elenyanga ezimbili uDingindawo wakhumbula ukuyatshengisa ugogo wakhe umakoti njengoba laye umakoti wayevela eZimbabwe bathwala imitshaqana yabo baqonda kibo lengane zabo ezimbili.
Unina kaDingi wayesewabhubha, uDingindawo wazalelwa ekhaya lapho okuzalwa khona unina ewoniwe ngumfana owayeselusa inkomo, kazange besathathana ngoba abazali bakwenqaba lokhu.
Emva kwalokho unina wayakwendela koSikhobokhobo lapho afika azala khona uTholakele labanye abathathu wasebhubha. Ekufikeni kwabo ekhaya kugogo nguye osevumbulula ubuhlobo babo ngapha inkonyane isikhabile ithunga yachitha uchago. Kulokuthi bajabule kwakhala ugogo, kwakhala uDingindawo lo Tholakele kwaze kwakhala lengane zabo ngoba zibona abadala bekhala bengatshaywe muntu.
Online Reporter