Online Reporter
USEHLALA komakhelwane owesifazane weMzinyathi eNanda eSouth Africa oxotshwe ngakibo ngoba bemsola ngokuthi uvulele umfowabo icala lokuhlukumeza indodakazi yakhe eleminyaka engu-12.
Unina wengane ongeke aqanjwe ngegama ngenhloso yokuvikela indodakazi yakhe, kuthiwa uxotshwe ngakibo ngemva kokubotshwa kukamfowabo, othethwe ngamapholisa ngempelaviki ngemva kokumvulela icala lokudlwengula. Ngokuthola kwaleliphephandaba, ingane ibhoboke kunina kulandela ukuba eyiphose imibuzo ngoba eyibona ingekho esimeni esihle.
Kuthiwa umsolwa ubotshwa nje, ubengaqali ukusoleka ngalumkhuba njengoba ngaphambilini eke wahlukumeza, kodwa kwangenela umndeni njengoba icala lacina lingavulwanga. Ekhuluma lentateli unina wengane, uthi isono sakhe esiholele ukuba axotshwe kubo yikuthi uvulele umfowabo icala lokuhlukumeza ingane.
Elandisa, uthe lesi sehlakalo senzakale engekho esesontweni izingane zisele loninalume. “Ngalolusuku eyenzeka ngayo ngabuya nganganaki ukuthi kukhona okungahambi kahle enganeni. Ngiqale ukuqaphela phakathi kwesonto ingane ibuya esikolo ikhala ngekhanda. Ngiyinike amaphilisi yalala kodwa yavuke ingeyinhle kahle. Ngikhulume layo ukuba ingichazele ukuthi kwenzakaleni yangafuna ukukhuluma. Ngize ngabiza lomunye umama wakwamakhelwane ukuthi angibhekise ukuthi ngabe yini inkinga, ngoba ibivele ikhale, igcine isitshelile ukuthi uninalume uyihlukumezile ngosuku engangiye ngalo esontweni. Siye sayabika udaba emapholiseni, ingane yasiwa kudokotela kwabe sekuvulwa icala. Kudlule usuku wabe esebotshwa umfowethu,” utsho njalo.
Eqhuba uthi uthe uma ebuya emuva kokuba esebotshiwe umfowabo, ilunga lomdeni lambuza ukuthi ubengayitsho ngani lento ukuze umdeni uzahlala phansi uyilunguse kungaze kufakwe amapholisa.
“Lisuke lapho langitshela ukuthi ngiphume ngiphele ekhaya, ngingaphinde ngibuye ngoba lento bekumele ixoxwe ngaphakathi emdenini ingaze ifinyelele emapholiseni. Ngikhuluma lawe nje ngihlala komakhelwane,” kutsho unina wengane.
Okhulumela amapholisa eKwaZulu-Natal uColonel Robert Netshiunda, usiqinisekisile lesi sehlakalo watsho ukuthi amapholisa abophe owesilisa ngecala lokudlwengula, kulindeleke ukuba avele enkantolo khona maduze. —Ilanga
