Online Reporter
YiNtatheli kaMthunywa
AMAPHOLISA eGokwe North abophe inina elileminyaka engu-33 yokuzalwa elisolwa ngokuthatha igazi lentombazana eleminyaka elitshumi eGokwe Centre.
UMavis Sibanda olendawo yokuthengisela izigqoko eGokwe Centre nguye osolwa ngecala leli.
Isizatho sesenzo lesi lokhe singakaziwa.
Abantu elizweni babuye bezwa ngendaba le esabalaliswe kunkundla zokuxhumana lapho okulenina ebelibika ngendaba le.
Isikhulumi samapholisa eMidlands uInspector Emmanuel Mahoko ufakaze ngesehlakalo lesi esitshwaqisa umzimba esesitshiye izakhamizi zeGokwe zitshe amathe.
“Amapholisa akuleli abophe inina elileminyaka engu-33 yokuzalwa ngecala lokuthatha igazi lentombazana eleminyaka engu-10.
“Icala leli lenzakala mhlaka 26 Nkwenkwezi edolobheni leGokwe ngehola letshumi ekuseni,” kutsho uInsp Mahoko.
UInsp Mahoko uthe umetheswacala uMavis Sibanda weGokwe, wayelapho athengisela khona edala icala leli.
“Kucatshangelwa ukuthi wabiza umntwana oleminyaka elitshumi owayesedlula wasemhlaba ngejekiseni ngaphambi kokuba athathe igazi lakhe eligcwala ijekiseni leyo.”
UInsp Mahoko uthe uSibanda wabotshwa njalo usezandleni zamapholisa njengoba uchwayisiso lusaqhubeka.
