Innocent Kurira
UMGCINISIHLALO weZifa Southern Region uChris Mtungwazi uthe uyathokoza ngentuthuko esiyenziwe ngaphansi kobukhokheli bakhe kulisizini.
Umkhokheli lo, ubabaze ukukhuphuka kweHwange isiya kuPremier Soccer League lokuqina kweBulawayo Chiefs ekugcineni indawo yayo kuligi ephakemeyo, egcizelela ngokuthi kuyisitshengiselo sokuqina kwenguqu emhlubulweni ongezansi yelizwe.
Ngesizini ka-2027 yeCastle Lager Premier Soccer League, isabelo seSouthern Region sizakuba lamaqembu amane, okuyintuthuko uMtungwazi athe itshengisa ukuthi ezinye zezinhloso zabo seziqalisa ukugcwaliseka.
IHighlanders, Chicken Inn, Bulawayo Chiefs leHwange yizo abazamela isabelo lesi kuligi ephezulu ngesizini ezayo.
UMtungwazi uthe kuyamthokozisa ukubona amaqembu esenza kuhle, ikakhulu ngemva kwesizini enzima lapho iBulawayo Chiefs obekudingeka ukuthi ilwele ukusinda ukuze kuyefika emidlalweni yokucina.
Amakhosi aqinisekisa ukuhlala kwawo kuligi yePSL ngemva kokunqoba iHunters FC nge 2-0 enkundleni yeLuveve ngeviki edluleyo. Amabhola kaJimu Gwara loPanashe Shoko esigabeni sesibili yiwo anceda iqembu leli ukuthi lingehleli kuDivision One.
IChicken Inn layo yenza umsebenzi omuhle ngokunqoba i-Agama FC nge 3-1 enkundleni yeBarbourfields.
Impumelelo yeHwange iqakathekile ngemva kokuthatha isicoco seligi ye-2026 Pacific Breeze Southern Region Soccer League, okuyikho okubenze bathola ilungelo lokubuyela kuPSL.
Iqembu leli liqede isizini lilemiklomelo engu-76, lidlula iTalen Vision ngamane, njalo selibuyele kusigaba esiphezulu ngemva kokwehla kuso eminyakeni emibili edlulileyo.
“Lokhu kuyintuthuko ethokozisa kakhulu kithi njengesabelo. Siyathokoza ukuthi iBulawayo Chiefs isindile ekwehleleni, njalo leHwange ithole ilungelo lokubuyela kuPremier Soccer League.
“Lezi yizo kanye izinto esifuna ukuzibona ngoba inhloso yethu kusukela ekuqaleni bekuyikuthi sibe lamaqembu amanengi avela eSouthern Region adlala kusigaba esiphezulu,” kutsho uMtungwazi.
Uthe ukuba lamaqembu amane kuPSL kuqinisa ukumelwa kwesabelo emdlalweni webhola eliphezulu elizweni njalo kuvulela abadlali, abaqeqetshi labanye abathinteka kwezemidlalo amathuba.
“Ukuba leHighlanders, Chicken Inn, Bulawayo Chiefs loHwange kuPremier Soccer League kuyimpumelelo enkulu kithi njengesabelo.
“Kusinika amandla njalo kuvulela abadlali, abaqeqetshi labanye abasebenza kwezebhola amathuba amanengi. Sifuna ukuqhubeka sisandisa inani lamaqembu ethu,” kutsho uMtungwazi.
UMtungwazi uthe intuthuko yebhola esabelweni akumelanga ilinganiswe ngenani lamaqembu akuPSL kuphela, kodwa kufanele kukhangelwe lamandla emincintiswano lokudonsa usekelo oluvela kumankampani.
Enye yempumelelo ayiqakathekisayo ngaphansi kobukhokheli bakhe yikuthola usekelo lwenkampani yePacific Cigarette Company, eyaba ngumsekeli omkhulu weligi yeSouthern Region, yaphinda yaqanjwa ngokuthi yiPacific Breeze Southern Region Soccer League.
Isivumelwano lesi ese-US$37 000 sanika iligi usekelo, kwaba lemivuzo yamaqembu, abadlali labaqeqetshi lemali yemiklomelo yeqembu elathatha isicoco.
“Ukuthola usekelo lwePacific kwaba yimpumelelo eqakathekileyo kithi. Sasifuna ukuthi iligi yethu ikhange, ibe lokuncintisana okuqinileyo njalo iqhubeke ikhula ingelahlupho.
“Ukuthola inkampani ezimisele ukusisekela kusinika isibindi sokuthi sihambe ngendlela eqondileyo,” kutsho uMtungwazi.
Uthe usekelo lolu luqakathekile ngoba iligi yesabelo isike yahlutshwa yikuswela amankampani azimiseleyo ukuyisekela ngemali.
UMtungwazi uthe lanxa ukungena kuPSL kuyimpumelelo, amaqembu kumele azilungiselele kuhle ukuze angabuyeli emuva masinyane.
“Umsebenzi wethu khathesi yikuqinisa impumelelo esesiyizuzile. Kasifuni ukubona amaqembu esiya kuPSL kodwa afike lapho ehluleke.
“Sifuna amaqembu ancintisane, aphathwe kuhle njalo abe lamandla okuqhubeka ekuligi yePremier Soccer League,” nguMtungwazi lo.
