admin
Mthokozisi Dube
“ASIYEKELENI ukudlala umacatshelana.Sesizakuthi sinxuswa kweminye imidlalo sithandabuze ngoba phela labafana bayabe bekhangelele inzuzo zabo. Abadlali bacina sebecabangela ukuthi uGumede ngomkhaba omkhulu nguye yedwa odla imali kukanti kuyabe kungaphumanga lutho njengakhathesi.”
La ngamazwi kaNdumiso Gumede umaqhuzu weHighlanders okhala ngokuthi iqembu lakhe selithwele nzima ngoba alikatholi ngitsho lendibilitshi eyodwa ekuphathekeni kwalo kunkezo kazibuse lonyaka lakunkezo ye Bob @ 91 nyakenye.
Umaqhuzu weqembu lo ubike ukuba ezikaMagebhula zazithenjiswe imali ekuphathekeni kwalo emqhugelwaneni kazibuse lapho elaphetha linqotshwa yiChicken Inn kodwa lasala libambe iziboya kuphela.
UGumede wengezelele ngokubika ukuba iqembu leTshilamoya laba lendleko ezinengi kulandela ukuba lazithwalela abadlali labhalisa amajesi abadlali kukanti amaGamecocks athwalwa ngabaqoqi balo umdlalo okuchaza ubandlululo.
“Silokhe sikhongozile. Lonyaka sasebenzisa inkulungwane zamadola kodwa saphiwa ikhulu lengxenye kukanti iChicken inn yathwalwa nguBravo. Nxa singabantwana asiphathwe ngokufanayo,” kuveza uGumede.
Umaqhuzu weTshilamoya ubike ukuba kulencwadi evele kuhulumende ebika ukuba imali engange $35 000 eyahanjiswa kukhomithi eyayiqoqa limidlalo kodwa okusuka kujinge imibuzo yikuthi eyabo imali kayifakwanga kuleyo mali.
“Amadlwane thina asiwadlali abafana balambile, bafuna inzuzo zabo. Okungokwethu kakuze phela,” kubika uGumede.
UGumede uphethe ngokubika ukuba sebezebababhalela incwadi kulandela ukuthi iqembu libuyela muva ngenxa yale imali.
Ngesivumelwano sale inkezo iBosso yona eyaba ngeyesibili kulandela ukudliwa kwayo ngama Gamecocks kwakumele ithole i$15 000 kukanti iChicken Inn kwakumele ithole i$20 000.
Online Reporter