Online Reporter
Fungai Muderere
UMQEQETSHI weqembu leChicken Inn uTonderayi Ndiraya useveze ukwethemba abadlali bakhe nanko kukhangelelwe ukuthi iqembu leli libhekane leDynamos FC enkundleni yeBarbourfields Statium ngeSonto.
Uthe iqembu lakhe selisesimeni sokuncintisa.
Iqembu leli, lakoBulawayo selidlale imidlalo emibili lamanye amaqembu akoNtuthu, iHighlanders eyalinqoba nge 3 -1 kunye leBulawayo Chiefs eyanqoba 2 – 0.
Kumdlalo wayo leHighlanders kuviki ephelileyo, iChicken Inn iqale isenza kuhle nanko ihlandla lakuqala liphele ikhokhela kodwa yehlulwa kuhlandla lesibili.
Lanxa idliwe kumidlalo emibili, uNdiraya uthe ukholwa ukuba iqembu lakhe lingenza izimanga kumdlalo walo leDynamos.
“SiyiChicken Inn, singabe siphansi okwakhathesi kodwa sizavuka, sivikele indawo yethu,” kutsho uNdiraya.
Umqeqetshi lo uthe ukungaphumeleli kweqembu lakhe kubangelwe zimvimbi zakhe kodwa akholwa ukuba usebalolonge baphelela. Uncome abadlali bakhe ngokubambana kanye lokuzwisisana kwabo.
“Kubuhlungu ukunqotshwa kumidlalo yangekhaya. Sehluleke ukuvimba amabhola ngezikhathi ezibalulekileyo, njalo lokhu kudinga ukuba sikulungise masinyane,” kutsho yena.
“Kodwa-ke, phezu kokwehlulwa, uyakubona ukuzwisisana eqenjini. Kumele siqoqe kakutsha, sizihlele futhi sigcine abadlali beqinile ngokomqondo.”
Umdlalo wangeSonto eMagumeni unikeza iChicken Inn ithuba lokuthi iqale kutsha umkhankaso wayo ibhekene lenye yeziqhwaga kuligi. Impumela enhle inganikeza ukuphakama okufika ngesikhathi esifaneleyo.
Ngemva kwemidlalo eyisitshiyagalolunye, iChicken ihlezi kunombolo yesitshiyagalolunye kulogu ilemiklomelo engu-12. Isinqobe imidlalo emithathu, yaba ngutshiki lobhanqa kwemithathu, yadliwa kwemithathu.
Kweminye imidlalo yeviki letshumi ehlelelwe ukuphela ngempelaviki, iqembu le Highlanders elihluzukileyo, lizakuya edolobheni leHarare kusasa lapho elizadibana khona le Herentals enkundleni yeRufaro.
Abafana abatsha be-PSL i-Agama ngoMgqibelo bazadlala leqembu leFC Platinum kuthi iCAPS United izadibana leBulawayo Chiefs.
I-Harrock izadibana leFC Hunters eKwekwe enkundleni yeChawanda.
Enkundleni yeNyamhunga kuzadlala i-ZPC Kariba leMWOS.
INgezi Plationum Stars izanandisa iManica Diamonds eBaobab Stadium kuthi iqembu elathatha inkezo yeligi nyakenye iScottland FC izabhekana le-Simba Bhora.
ITriangle United izahlangana leTelone edonsa nzima eGibbo Stadium.
Imidlalo yeCastle Lager Premier Soccer League Week 10
NgoLwesihlanu: Herentals College vs Highlanders (Rufaro Stadium)
Mgqibelo: Agama vs FC Platinum (Wadzanayi Stadium), CAPS Unmited v Bulawayo Chiefs (Rufaro Stadium), Hardroc vs FC Hunters (Chawanda Stadium), ZPC Kariba vs MWOS (Nyamhunga Stadium)
Sonto: Chicken Inn vs Dynamos (Barbourfields Stadium), Scottland FC VS Simba Bhora (Rufaro Stadium), Triangle United vs TelOne (Gibbo Stadium)
