Uza ngomfutho njalo umdlali weBosso

YiNtatheli kaMthunywa
IMVIMBI yomdlali uPeter Muduhwa useqede isizini ngesibomvu kulandela ukukhethwa kwakhe kuqula labadlali ababonakale bezingcitshi kulisizini.

UMuduhwa uvale ngci enkundleni kuyo yonke imidlalo kwaze kwavuma labaqeqetshi bamanye amaqembu kunguqu yeCastle Lager.

Umdlali lo ubike ngokuthaba okukhulu ukuthi usebalelwa kubadlali abazwayo kuleli. Utshele iphephandaba likazulu ukuthi isicoco sekhalenda yeCastle Lager yiso abesikhangelele.

“Ngijabulile. Ukungena kukhalenda kube yikugcwaliseka kwesifiso sami njengomdlali. Ngibonga abadlali bonke kuHighlanders kanye lomqeqetshi ngokunginikeza ithuba lokudlala,” kutsho uMuduhwa.

NgoLwesihlanu lilanga elikhulu kumdlalo wenguqu. Kuvulwa incwadi eyethula umbiko wokuthi nguphi umdlali wenguqu kuzwa izwe lonke jikelele ngo2016.

Lisiyatshona abalandeli bazakwazi lokuthi abanye abadlali ababili abedlule abanye ngobani.

Incwadi elamabizo la kubikwa ivalwe ngci njalo izavulwa phambi kwenkundla ezakuthi gwaqa esigodlweni ntambama.

Ziyatshaya inhliziyo zabadlali abalitshumi lanye abangena kukhalenda yezingcitshi kuCastle PSL.

NgoLwesibili kuliviki intatheli zihlangene labaqeqetshi labokaputeni bamathimu zakhetha ingcitshi ezingu-11 zaphinda njalo lokukhetha ingqwele yabo bonke.

Iqiniso yikuthi imivuzo yombuthano wangoLwesihlanu ngeyabathathu ngakho phakathi kwetshumi lane akwaziwa ukuba inhlanhla izawela ngaphi.

Isizwe sizakuthi nhlo amehlo kumqeqetshi weCaps United uLloyd Chitembwe olethe inguquko enkulu kuqembu lakhe.

Nampa abadlali abangene kukhalenda

Peter Muduhwa (Highlanders), Leonard Tsipa (Caps United), Hardlife Zvirekwi (Caps United), Ronald Pfumbidzayi (Caps United), Gift Mbweti (Hwange), Godknows Murwira (Dynamos), Petros Mhari (FC Platinum), Winston Mhango (FC Platinum), Walter Musona (FC Platinum), Clemence Matawu (Chicken Inn), Libery Chakoroma (Ngezi Platinum).