adminSilo Cornelius Luphahla
MTHWAKAZI kaNdaba kambe kulezinsuku ngubani ongathandabuza ukuthi sokusensukwini zokucina? Khona uyabe ethandabuzani njalo edabuka kuliphi ilizwe? Angithi nje osokusenzakala khathesi sokuyiyo imihlola eyabonwa ngabadala efana xathu lenkomo ezitika ngamaqanda enkukhu. Vele kwake kwenzakala ngaphi khonokhu esesikubona kusenziwa yintsha yalezinsuku?
Ekadeni isitabane kwakuyinhlaka yotshani engabonwayo njalo kwakungaziwa ukuthi kuzakuba khona kodwa lamuhla ontanga sebevuke ubunke nanko phela baziqhenya ngamanyala libalele bengagqize qhakala. Uthola umntwana oyintombazana seziphatha sajaha sehamba ekhwenyezela bakithi ngapho efake isandla esisodwa esikhwameni okusuka kudanise ukuthi bakufundiswa ngubani lokhu njengoba abazali babo bengakwazi?
Babetsho beqinisile sibili oNdukuzibomvu amajaha omkhonto nxa babethi umfaba uyazalwa yinhlanyelo ekhethiweyo njalo iganu liyalizala ilungakazi. Nanku sikubona ngamehlo batayi benkosi. Ngeqiniso insimba sezibanjwa ngamagoda abolileyo.
Okusuka kungethuse yikuthi inengi lezitabane lezi ngamantombazana, asazi kumbe amajaha akulezinsuku kawasakwazi ukuqomisa na? Kambe yibugwala bamajaha obenza amantombazana aphenduke amajaha? Kodwa ngabe kunjalo ngabe amantombazana la aqomisa amajaha hatshi ukuqomisana wodwa.
Kuthi kunjalo abanye bala mantombazana ayizitabane bahle sibili uMdali wababumba ngesineke okokuthi ngeke baswela amajaha azisondeza kuwo. Asazi ukuthi basuka bangenwe yini baze bakhethe ukuzenza amajaha amanye amantombazana. Lokhu kuveza sobala sibili ukuthi yiyo i-satanism le eyafikayo ngakho sibabusa ontanga.
Izitabane lezi sezivame kakhulu ezikolweni asazi kumbe ababalisi bona bathini nxa bebona abantwana bemila impondo bengena igusu. Sokunzima bakwethu kodwa kuhle phela ukuthi lixhotshwe libhekile okuyikuthi ababalisi labo bazame ubungcono babo bengamani bahlale phezulu kwezandla bethi yekela kukhule lokhula. Asazi bakaMalandela, ngeqiniso sizamila inkwili singasi Manyanyadu owabonwa ngabantu.
Lani bontanga ake lizame ukuzikhuza lingaze ledlulwa yizinyamazana ezaziyo ukwehlukanisana ngobulili. Kambe ngubani owake wabona insimba kumbe oqaqa behamba belandelana bengabasikazi bodwa? Pho nxa inyamazana zisenelisa ukwehlukanisana ngobulili lina kungani lisehluleka? Kambe ukuthi izitabane lezi ziyaluncinda sibili uluju lwemvelo? Khona zizaluncinda njani vele angithi kufana xathu lobuthakathi lokhu okwenziwa yizitabane.
Uthola intombazana sigqoke ibhulugwe yalilengisa sikhuluma isiYemujakala ulimi lwamazimu susizwa kuthiwa “asikwantshe jeki siyecova amangwanda ku-member…” Kambe kuyini khonokhu bontanga selilahla ulimi lwenu likhuluma ulimi olungaziwayo lokuthi lulesiko bani? Angithi lolulimi nje yilo olulilethela amadlozi amazimu angaziwayo liphethe selingasenelisi ukwehlukanisana ngobulili seliyizitabane.
Lani majaha ake lizame ubungcono benu lizibike kumantombazana kwehlule lizamile. Isimanga yikuthi amanye amajaha lawo seyizitabane bakithi asazi ukuthi kusani lokhu. Pho abazali bakusasa bazavela ngaphi njengoba intsha sikhalela ubutabane? Lafa elihle kakhulu bakwethu! Kusiya ngami ngabe izitabane lezi ziphiwa isigwebo sazo esikhulu sibili.
Guqukani bontanga, libulala ubuzwe benu bakithi!
Online Reporter